الجبلاية لما تفلس ترفض رجوع الفلوس ليها

مش قلت لحضراتكم قبل كده إننا ملينا كتابة أول مرة.. ومستحيل.. ولا يمكن.. وكده!
آهه.. اتحاد الكورة هو اللى بيعمل حاجات تخليك تقول كل الكلمات دى ورا بعضها!
السادة فى 5 شارع الجبلاية راحوا على وزارة الشباب والرياضة، وقالوا للمسؤولين: يا سادة يا كرام عندنا عقد رعاية.. فيه غرامات، الشركة قالت حاجة وعشرين مليون، وإحنا قلنا 12، 13 مش مشكلة، وأخيرًا وصلنا ل9 مليون جنيه، ندفع منهم 3 مليون، وال6 تدفعهم الأندية.. بسم الله ما شاء الله!
الوزارة لم تقصر.. أرسلت لجنة وفيها أعضاء من اتحاد الكورة!
اللجنة راجعت كل الغرامات، وطلعت تقريرها اللى بيقول إن الغرامات.. أسمع بقى سيادتك يا أفندم الآتى..
لجنة الوزارة واللى معاها من اتحاد الكورة قالت إن كل الغرامات والمخالفات لا تكمل نصف ميلون جنيه.. على وجه الدقة سيادتك 479 ألف جنيه.. يعنى نصف مليون إلا 21 ألف جنيه بالتمام والكمال.. والباقى على الله!
فجأة.. يخرج مسؤولو الاتحاد ليؤكدوا أن اللجنة الوزارية اللى معاها ناس من المجلس ماشفتش حاجة، وإن الغرامات.. يعنى الفلوس اللى لازم تتخصم من حساب الجبلاية لدى الراعية 9 مليون جنيه.. وأى كلام تانى مش صحيح، ولا يمكن أن يرقى للصحة بأى حال من الأحوال!
يا سادة.. واللى ما يعرفش.. يعرف.. العقود.. والفلوس لابد أن تراجع بمعرفة الوزارة، فلا جدوى من قول: إحنا اللى طلبنا الوزارة تنظر فى الموضوع!
أيضًا تقرير الوزارة، وكالعادة فى المنطوق الحكومى الرقابى جاء فيه أن رفع هذه المخالفات، بالإضافة لمخالفات أخرى فى تنفيذ بنود تعاقدية، أن عدم رفع هذه المخالفات يذهب بمن لا ينفذ إلى النيابة العامة، لأنها فلوس مصر.. يا سادة!
المهم.. إن جماعة الجبلاية بتقول ده تحت بند التدخل الحكومى، وكمان اللى طلع الكلام شفوى وتحريرى هو أحمد مجاهد، عضو المجلس، وسلمه إلى الوزارة!
طيب ماشى.. يعنى ده صحيح ولا.. لأ؟
بلاش كده.. هو فيه إيه.. إذا كان الحساب غلط، هاتوا محاسبكم ومحاسب الوزارة ومراجعين ومستشارين قانونيين، ويراجع الجميع كل شىء.. هذا من ناحية!
طيب من ناحية تانية.. ما نعلمه أن الشركة الراعية أكدت أنها مستمرة فى تعاقدها، بما يعنى أنها جاهزة للتفاوض، وربما سماع صوت الصح، ولن أقول الحق، فربما هناك أخطاء بشرية، ولن نقدم أى اتهامات، لكن أيضًا لا يمكن الصمت على أن الكلام ممنوع، وأن أى حوار إما أن يكون شكًا فى البشر، وهذا لن يحدث لأنهم فوق مستوى الشبهات بكل تأكيد، أو أن يكون تدخلًًا حكوميًا!
يا سلام.. هو فيه إيه؟.. كل ده علشان تقرير بيقول إن فيه حقوق مالية.. والله مش فاهم.. هو فيه إيه؟!