السيد يتحول من نجار إلى قعيد كرسى متحرك بعد إصابته فى عمله..قال ل"اليوم السابع " مازحا :"التأمينات" بتجبرنى كل سنة على إثبات عدم زواج والدتى التى تبلغ من العمر 80 عاما"

"خرج بحثا عن لقمة العيش لكن القدر كان فى انتظاره ليصبح عاجزا وقعيد كرسى متحرك ينتظر كل سنة قرار "التأمينات الاجتماعية " الرحيم بالموافقة على مد معاشه الذى يكفل له العيش بصورة كريمة "..هذه حالة "السيد شاكر" الذى يعانى العجز ويحاول الصمود والصبر على قضاء الله .
قال"السيد" ل"اليوم السابع":" أكل العيش صعب ولازم الواحد يتعب ويشقى عشان يلاقى اللقمه ولكنى مكنتش متوقع أنى أتحول لعاجز وأقعد على كرسى، كان يوم عادى خرجت فيه لشغلى فوقعت من على ماسورة صرف صحى وانا بركب شباك واصيبت بكسر فى العمود الفقرى وحاولت العلاج بعدها وكنت بامشى بجهاز فى رجلى وعكازين، وباشتغل عشان اقدر اعيش رغم تعليمات الدكاترة بأنى متعبش واجهد نفسى ومن 4 سنين وقعت وقعه عادية فاتكسرت قصبت رجلى وحالتى بقيت اسوء ودلوقتى عايش بكرسى متحرك".
التامينات تطلب اوراق ملهاش لازمة ما يؤرقنى
وأضاف "السيد":" باخد معاش والدى وماشى بيه والحمد الله وكل سنه لازم اروح اعمل كشف طبى يثبت سوء حالتى عشان التأمينات والمعاشات تصرف المعاش كانى باستنى قرار الحياة والموت، والمشكلة اللى بتقابلنى الروتين خصوصا وانا عاجز اصل الموظفين بيطلبوا اوراق ملهاش لازمة ..وردد مازحا :وتباع انهم عايزين شهادة تثبت أن امك متجوزتش رغم ان عندها اكتر من 80 سنه!.
واستكمل "السيد" :الكرسى اللى أنا قاعد عليه جبته من جمعية الوفاه والأمل وسعره 300 جنيه وكل فتره باضطر اصلحه رغم أنه غير مريح وبيتعبنى لكن الظروف بتجبرنى أعمل كدا .. كل اللى عايزه كرسى مريح عشان اعرف اتحرك ومتعبش حد وانا رايح انام أو باتحرك فى البيت .
السيد : احمد الله على عدم الانجاب
وتابع"السيد":انا متجوز من سنة 2000 ومعنديش أولاد ولكنى باحمد ربنا اصل انا مش قادر اكفى نفسى هكفى أطفال ازاى .. وانا عايش مع زوجتى وراضين فى شقه دور أرضى عباره عن اوضه ومطبخ وحمام وحالتها متهالكة وصعبة .