في الأول أنا عايز أقولكو أنو عجبني جدًا الخطاب بتاع "السيسي" الراجل جاي بيقول أنا عارف إنها مسئولية تقيلة وعارف أنا داخل على إيه.. في فقر و في ناس مش لاقية تاكل وفي شباب مش لاقية شغل وفي ناس مش عارفة تعيش أساسًا، يعني الراجل من البداية كده مش جاى يكدب علينا أو ينافقنا ويقولنا مصر دي جنة والناس عايشة فيها مبسوطة!. هو جاي حاطط إيده على المشاكل وشايفها قدام عينيه بس عجبني أوي أنه قال "أنا حاسس بالتفاؤل ومعنديش يأس ومش هستسلمله"، وأنا نفسي أتكلم معاه وأقوله الناس عايزة إيه لأني متأكد أن هو الرئيس اللي جاي ومن الجولة الأولى وعشان كده بقولك يا سيادة الرئيس عبد الفتاح السيسي الناس عانت وتعبت كتير من الظلم و"التهميش" أيوة "التهميش" المواطن المصري في بلده بقى بيحس أنه مهمش وملوش مكان فيها، الغريب بياخد معاملة أحسن منه جوه بلده، والشباب اللي من كتر ما ضاقت بيهم جوه بلدهم بقو بيهاجروا.. إحنا عاوزين نقضي على ده تمامًا بدل ما بنروح نشتغل ونتعب برا بلدنا إحنا عاوزينك توفرلنا الشغل ده هنا في بلدنا. ومشكلة زى مشكلة القمامة اللي كل ما رئيس ييجي يقول ها يحلها ومبتتحلش، والمروراللي سبحان الله تحس إنه غير قابل للانظباط، والتأمين الصحي والعلاج في المستشفيات الحكومية اللي الناس بتدخلها "عشان تموت" مش عشان تتعالج، ومياه الشرب اللي أحيانًا ملوثة وأحيانًا ناقصة، ومرحلة فقر مائي ولّا أصحاب المعاشات اللي بيبقو ناس عواجيز معديين سن الستين وتلاقيهم واقفين بالطوابير؛ عشان يصرفوا معاشهم اللي هو أساسًا مبيكفيهمش حتى لنص الشهر. المصيبة الأكبر بقا العيش اللي مش بنلاقيه عيش أصلًا ومليان من خيرات ربنا (مسامير وقش وشعر)، ولا السياحة اللي تقريبًا فقدناها وأملنا إنها ترجع تاني، إحنا معاك بس ده لما يتحققلنا الأمن والأمان وترجع هيبة الدولة تاني بس من غير ظلم، ولازم يكون عندنا تعليم بجد مش تعليم بيطلعوا منه بعد حوالي 22 سنة يقولولهم "خدوا كورس عشان تشتغلوا" يبقى مكناش اتعلمنا من الأول أحسن بقى، وعشنا عمرنا كورسات، نفسي فعلًا ألاقي المواطن عايش مبسوط وبيخرج يتفسح و شايف أن بلده حياته وأمله ودنيته كلها فيها.. عفوًا سيادة الرئيس لإطالتي على سيادتكم، ولكننا ننتظر منكم الكثير، وسيعينك الله على حل مشاكل هذا الشعب الذي لن يخذلك إن طلبته، نفسي بجد مصر تبقى أد الدنيا عشان هي أم الدنيا.
