ننشر اعترافات المتهمين باقتحام شقة عجوز وقتلها بالجيزة: اتفقنا على سرقة شقة الست "عايدة" علشان عايشة لوحدها.. "مكنش قصدنا نقتلها ولما حاولت تصرخ "محمد" خنقها.. متهم:"جالى حالة صرع وجريت لما شفت الجثة"

حصل "اليوم السابع" على اعترافات العاطلين المتهمين باقتحام شقة عجوز بالجيزة وخنقها حتى الموت لسرقتها، حيث ذكر المتهمان "محمد.ع" و"فادى.ط" فى أقوالهما: "إحنا بنشرب مخدرات من زمان، ومش معانا فلوس نشترى بيها، وبسبب الكيف اللى بيتحكم فينا وبمزاجنا قررنا إننا لازم نتصرف عشان نحصل على أى فلوس بأى وسيلة، وساعتها لقينا إن أفضل وأسهل طريقة إننا نسرق شقة الست "عايدة" جارتنا، عشان هى ست كبيرة فى السن وكمان عايشة لوحدها ومعاها فلوس كتير".
المتهمان: قتلناها خشية افتضاح أمرنا
وأضاف المتهمان: "اتفقنا أننا نضحك عليها ونقولها إننا مطرودين من البيت وهنقعد عندها شوية، واستنينا لحد ما رجعت لشقتها وخبطنا على الباب وطلبنا منها تفتح، لكن هى فى البداية رفضت، وبعدين لما فتحت الباب بحذر "محمد" قام دفع الباب بقوة فخبط فى وشها ووقعت على الأرض وأغمى عليها بسبب أن رأسها اصطدم بالأرض، بعد كدا "محمد" قام خنقها لحد ما ماتت عشان متفضحناش وتقول إننا اقتحمنا الشقة".
وقال المتهم "فادى": "لما (محمد) خنق الست (عايدة) أنا جالى حالة صرع وهياج، حسيت بالرعب وصرخت وسبت الشقة وجريت من المكان، ومسرقتش حاجة".
وأكمل المتهم "محمد" اعترافاته قائلا: "لما فوجئت إن الست (عايدة) دخلت فى حالة إغماء وفقدت الوعى، قررت إنى أقتلها، وخنقتها ب"إيشارب" لحد ما فارقت الحياة، وبعدين فوجئت ب"فادى" بيصرخ وجرى وسابنى لوحدى، ودا خلانى أحس بالخوف وفتشت بسرعة فى الشقة عن الفلوس والمجوهرات بتاعتها، لكن ملقتش حاجة فهربت من المكان من غير ما أسرق أى حاجة".
المتهمان: لم نقصد قتلها وخططنا فقط لسرقتها
وأكد المتهمان فى اعترافاتهما: "إحنا مكنش قصدنا نقتلها، إحنا كنا ناويين بس نستغل إنها ست عجوزة وعايشة لوحدها ونسرقها بس من غير ما تاخد بالها، لكن لما رفضت تفتح الباب فى الأول قررنا نقتحم الشقة وخفنا إنها تعترف علينا".
وأكد مصدر أمنى بمديرية أمن الجيزة، أنه تم الكشف عن الجريمة عقب عثور ابن شقيق المجنى عليها على جثتها بالشقة وأبلغ رجال المباحث بالواقعة.
كان اللواء محمود فاروق مدير الإدارة العامة لمباحث الجيزة، قد تلقى بلاغا من فرد أمن يدعى أفاد فيه بعثوره على جثة عمته "عايدة.م" 77 سنة ربة منزل داخل شقتها بدائرة قسم الجيزة، فتم تشكيل فريق بحث لكشف غموض الحادث، وتوصلت تحريات العميد على عامر رئيس مباحث قطاع غرب الجيزة والعقيد عبد الوهاب شعراوى مفتش المباحث الجنائية، إلى أن المجنى عليها فارقت الحياة نتيجة تعرضها للخنق باستخدام "إيشارب"، وتبين من خلال المعاينة وجود آثار بعثرة بمحتويات الشقة دون الاستيلاء على أى مسروقات، حيث عثر على مبلغ مالى كانت الضحية قد قامت بوضعه فى مكان سرى وسط "أدراج" مكتب.
ومن خلال تكثيف التحريات تبين للمقدم علاء فتحى رئيس مباحث قسم شرطة الجيزة ومعاونيه الرائدين طارق مدحت وهيثم خلف أن مرتكبى الجريمة هما "محمد.ع" 26 سنة عاطل سبق اتهامه فى قضية خطف ربة منزل واغتصابها وصديقه "فادى.ط" 15 سنة عاطل سبق اتهامه فى قضية سرقة.
وبإعداد كمين لهما تم ضبطهما، وبمواجهتهما اعترفا بارتكاب الحادث، فحرر محضر بالواقعة وأخطر اللواء طارق نصر مساعد وزير الداخلية مدير أمن الجيزة، الذى أحالهما إلى النيابة لتأمر بتشريح جثة المجنى عليها وتصرح بدفنها، كما أمرت بحبس المتهمين 4 أيام على ذمة التحقيق.