كلام.. كلام.. كلام.. كلام صدعتوا راسنا بالكلام كلام جرايد كلام إذاعة كلام برامج.. كلام إعلام شتتوا أفكار الآنام والفعل مش قد الكلام ***** مطبلاتى عامل برامج جاهل وطالع لى رايق قاعد يفسر فى الأحكام ومعاه ضيوف زيه تمام يتكلموا وبشكل عام عن القانون وإزاى يكون الحكم يصدر م.القضاء! والكل فاكر نفسه تمام فى العلم والفقه هُمام وهو علمه يادوب كلام ******* ملايين قناة فى الفضاء حتى الدين بقى له قناة فيها شيوخ تقول حلال وشيوخ تحلف يمين حرام والناس تاهت فى الخلاف تمشى يمين ولا تخاف تروح شمال يبقى حرام لا فيه معالم ولاحد عالم يشرح لنا معنى الخلاف ***** وفى السياسة وفن الكياسة حدث ياباشا وقول كلام عطوة وفاطمة وسلوى وهيام أصحاب برامج بدون نظام وفى الرياضة لاعب قديم كان جاب له جول أيام زمان قاعد يحلل فى المباريات كأنه استاذ علم الذرات ***** ولا برامج كشف المواهب والرقاصين والرقاصات غنى يا عبده وقول آهات عاملين معسكر بنين وبنات مفيش مشاكل فى الاختلاط ما الأم عارفة والأب فى سبات ويوم النتيجة نازلين عياط لا البنت تفشل وما تبقى ستار **** وبصراحة فلت العيار كتر الكلام ليل نهار لا حد فاهم ولا حد عارف والكل فاكر إنه عارف والسفسطة بقت المعيار والمشهود له بياع كلام وتُهنا ما بين السفسطة والكلام وبقينا عالم كله كلام.. كلام.. كلام ارحمونا يا ناس حرام شوية راحة من الكلام