بأحلم

بباب أفتحه
فى صبحية فجر أفتحه للنور
يدخل منه الدفا
وزقزقة الطيور
بأحلم بيتيم احضنه
ويعيش وسط الزحام
آمن ومستور
بأحلم بحب
فوق حدود الواقع والمعقول
بأحلم بكلام
اكتبه واردده واعيشله العمر أقول
بأحلم بإنسان
بفارس
راجل من ولكل العصور
بأحلم ببيت
دافئ صغير
لكنه احلى من القصور
بأحلم بصمت
لكل منحل وتافه ومنهور
بأحلم بدنيا للبشر
تتبلور فيها كل الأمور
بأحلم بغلط
مش بالصدفة كان
وعن إصلاحه حد مسئول
بأحلم برأى أقوله
من غير ميه تنبيه ومحظور
بأحلم بأمل
عايش فارح
مش على الأبواب والحارات منحور
بأحلم برضيع
يتولد معه بكره
ومايعيش مقتول
بأحلم بساعد
للعلم رافع
بجبروت وقوة المفتول
بأحلم بمثل اعلى
للعمر ...على الكتاف محمول
بحلم بغلبان
ع الحلم قادر مش ع المر مجبور
بأحلم بغنى
للنعمة فاهم
مش عايش بيها مكدور
بحلم بدين
سنة وإيه وعهد
بين فاعل ومعفول
بحلم ببراءة
مبداء واضح بيه معمول
بحلم بقصة
للحب عايشه
ومخلصه فيها السطور
بحلم ببستان
فيه البشر ندية
زى الزهور
بحلم بألم
أودعه
واعبر بعده للامان عبور
بحلم بسكه
امشيها
الندم فيها مالوش عنوان
ومش مأمول
بحلم بثنا
يتنثر بروحى
ويكون عملى عند ربى مقبول
بأحلم بست
تربى ابن عازم للقدس منصور
بأحلم بزعيم
يلم تحت جناحه الكل
واعى وصبور
بحلم بحبيب
يكون لى
بحمى يصون فارس جسور
بأحلم بسيف
بالعدل ناطق ظاهر مسلول
بأحلم بغصة
تنقلع من القلب
وتترفع الراس المحنى والمكسور
بأحلم بشمس
تسطع ويكون ظهورها أجرا ظهور
بأحلم بقمر
يلم العاشقين
ويعلمهم يعدوا السور
بأحلم بزمن
الحب فيه ملك
مش مسكين مبطور الإيد مشلول
بأحلم ببكره
وهاعيش احلم بيه
ولو العمر عدى
ومهما يطول
بأحلم بهوية
مابين جنية وحورية وعروسة البحور
باحلم بحلم
خيالى رومانسى
لكنه حقى شرعى
لا مسروق ولا منقول
باحلم وحقى احلم
ولا عمرى هاسمح يعيش جوايا مقهور