سنه فاتت وسنه جايه

وبيدور الزمان بيه
محدش عارف ف ايه بكره
بقت ايام ومقاضيه
وبنشوف اللى مش راضى
واللى ضاربها بروسيه
وحتى احلامنا مسروقه
ومش عارفنها فين هى
وتاهت منا ضحكتنا
ف سكه حزن مرويه
ودمعه ف العيون سالت
مابين صبحيه وعاشيه
سنه فاتت وسنه جايه
وام تلم ف عيالها
بعيش وملح مقضيه
واب م الهموم شايل
وماشى فيها بيعافر
ياناس الرحمه فين هى
سنه فاتت وسنه جايه
ياريت تكون لنا هديه
وننسى الفرقه والعتمه
وتصفى قلوبنا لاحبابنا
وترجع تانى لمتنا
وننسى قالوا او قولنا
وتبقى احلامنا ورديه
سنه فاتت وسنه جايه
سنه فاتت باوجعها
واحزانها وبدموعها
ياريت ربك مايرجعها
ولو بايدينا نشبعها
علقت موت مشفيه
يامصر ياسين وبهيه
سنه راحت ومش جايه
وهايعود الامان ليكى
وهاغزل توبك باديه
ومش دستور يخليكى
حزينه وباكيه ياغاليه
هانرسم ليكى دستورك
وعهد عليه لاصونك
ده دمى وروحى مصريه
سنه فاتت وسنه جايه
-------------------------------
كلمات من قصيده (سنه فاتت وسنه جايه)
الشاعر الصحفى عاطف السيد عبد العال
رئيس قسم الفن والادب بصحيفه الانباء المصريه