وجه الفنان خالد الصاوى الشكر للإعلامى عمرو أديب، الذى دعا له بالشفاء بعد أن قال بحزن خبر بعنوان "خالد الصاوى طلع من نسبة ال10% من المصابين بفيروس سى الذين لا يستجيبون للعلاج، ولكنه صاحب إرادة قوية وقال من قبل سأقهر المرض.. ربنا يشفيه". وكتب الفنان خالد الصاوى على صفحته الرسمية "شكرا من قلبى عمرو أديب شكرا من كل كيانى يا كل أحبائى ولا تقلقوا ربنا الحافظ".. والصورة دى مش حالية دى من أقل من سنة فى جراحة انزلاق غضروفى نزلت بعدها تصوير تفاحة آدم والجزيرة 2 والحمد لله إنى قدرت أدارى الزكة اللى خفت تدريجيا لحد ما كادت تنتهى الآن. وتابع "على فكرة الفاجومى وخاتم سليمان صورتهما وأنا باخد الأنترفيرون وهى حقن رزلة لحد لا يمكن تصوره ومن رزالتها -مثلا- هرى الجلد والبشرة وضعف الشعر والرموش! والتعب المهلك وغمة النفس وعكننة فى طعم ومقدار الأكل والاكتئاب -متوسط ل حاد- والأسوأ بقى.. اضطراب نوم وذاكرة! سنة ونص! بس الحمد لله كله عدى بسلام". واختتم الصاوى حديثه مؤكدا "وختاما صحيح علاجى به فشل ولكن الخبر الحلو إن عقار جديد -سوفالدى- متاح حاليا ومعه تركيبة وموجود هنا وبره حسب التركيبات والأحلى عندى أنه متوفر فى إيد وزارة الصحة وجارى صرفه لكل مريض تنطبق عليه الشروط وكذا.. يعنى المفروض أنه من عشرة لاتناشر مليون مصرى حيوصل لهم العقار ده بفاعليته الواصلة لحاجة وتسعين فى المية شفاء تام.. الخلاصة أن القلق مرفوع دلوقتى بإذن الله سواء عليا أو عليك أو عليها.. أو عليهم من أهالينا فى ريف وحضر فقيرين مريضين وحائرين خائرى العزيمة ظاهريا ولكنهم مصانع وحقول من صلابة ورضا.. ولو حتى كنت محتاج تركيبة من العقار ده من بره برضه ممكن ومش حيسقط منى الاحتمال ده بإذن الله".