قولى حاضر.. وطى صوتك.. اسكتى أحسن.. قواعد إرضاء الزوج الأربعون

على طريقة العظيم "جلال الدين الرومى"، وكتابه "قواعد العشق الأربعون"، قام عدد من نشطاء "فيس بوك" بنشر قواعد "أى حاجة الأربعون"، وانتشرت بشكل موسع على مواقع التواصل الاجتماعى "فيس بوك" و"تويتر"، وهى الطريقة التى يمكن من خلالها وضع مجموعة كبيرة من الأسئلة المعلقة فى الإطار نفسه، والسير على قواعد أربعين، لكل تفاصيل حياتنا، كالحب، العمل، الصداقة، أو الزواج، الذى يمكنك وضع قواعده الخاصة، خاصة فيما يخص رضا الزوج "كثير الطلبات" الذى يحتاج لقواعد محددة تساعد الزوجة على التعامل بحكمة من خلال مجموعة من الخطوات تجعله يشعر أنكِ على ما يرام.
1-متسأليش أبدا عن أى تفاصيل.
2-قوليله حاضر.
3-وطى صوتك.
4-اسكتى أحسن.
5-اوعى تسأليه أنت فين أو بتكلم مين.
6-إياكى وإياكى تسأليه عن باسورد الفيس بوك بتاعه أو تحاولى تمسكى موبايله.
7-قوليله حاضر.
8-لو قالك أنا شكلى هتجوز عليكى قوليله بصوت ناعم ورقيق وبابتسامة "براحتك ياحبيبى".
9-قوليله حاضر.
10-متسأليش ليه.
11-اتكلمى دايما عن بطولاته.
12-اشكريه على كل حاجة بيعملها.. "ومبيعملهاش".
13-قوليله حاضر.
14-وطى صوتك.
15- احفظى مواعيده.
16- سيبيله الريموت يجيب القناة اللى تعجبه.
17-قوليله حاضر.
18- امدحى فى كل كلمة بيقولها ولا كأنه براد بيت فى فيلم تروى.
19-لو شفتيه بيكلم واحدة تانية اطلعى بره وسيبيه يتكلم براحته.
20- لو اتأخر برة البيت أوعى تكلميه تسأليه جاى امتى.
21- استقبليه بابتسامة.
22-لو نده عليكى روحيله جرى ولا كأنك ميسى فى كأس العالم.
23-حضريله الحمام "ومتسألهوش الحمام بيتحضر إزاى".
24- قوليله حاضر.
25- اوعى تصحيه وهو نايم.
26- اوعى تفتكرى إنك ممكن تخرجى معاه لوحدكم.. أبسلوتلى، هيجيب معاه كل صحابه .
27-قوليله حاضر.
28-اكويله هدومه قبل ما ينزل.
29-حضريله فطار حتى لو مبيفطرش.
30-قوليله دايما أخبار سعيدة.
31-اعرفى إن القهوة وصحابه شىء مقدس بالنسبة له أهم منك ومن عيالك.
32-قوليله حاضر.
33-انسى إنه يفتكر عيد ميلادك أو عيد جوازكو وفاجئيه أنتى بيهم.
34-كلميه عن وسامته وأناقته خصوصا قدام صحابه.
35-اوعى تنشغلى بحاجة غيره طول فترة وجوده فى البيت "حتى لو مش شايفك أساسا".
36-اوعى تناقشيه فى أى كلمة يقولها.
37-اهتمى بأناقتك وجمالك وطبيخك وخسى.
38-اتفرجى على بنات كأس العالم.
39-اوعى تنسى إنه عنده ماتش كورة الخميس اللى جاى.
40-قوليله حاضر.