بعد الماتش قادها حريقة

بوتفليقة خد تعسيلة ونسى مين حرر له الدار
حط فى ودنه قطنة كبيرة وراح مولع فيها شرار
بعد الماتش قادها حريقة حتة جون خلاه ينهار
سنجة ومطوة فى ملعب كورة قالوا نولع فيها نار
نسيوا إن الكورة رياضة ولا ساحة للفرار
اكسب وافرح دا من حقك لكن عيب تقول كفار
وأبو روراوة معصب نفسه واكل شطة من العطار
تقولش قاد الجيش المصرى يكونش هازم التتار
دا إحنا خير جنود الأرض مين يتساوى بالأخيار
علم وفن وفكر غزير ومدنة تسمع للأعمار
مصر دايماً رافعة الراية ما تستسلم ليل ونهار
ولا مليون ماتش يخلى أرض العزة لا تحتار
الرياضة فوز وهزيمة لا تعصب لا دمار
السودان مش أرض محايدة كله يوحد للقهار
تكسب أكسب لا نتعصب ما فى بينا أبدا طار
الجمهور رايح يتمتع قاعد آمن عند الجار
لكن أسفى على المسلم دم أخوه بيسيل أنهار
وفد مصر حاجة تشرف مش شوية طوب وأحجار
شايل حلم بلاده فى قلبه راضى بقدرة الغفار
وأبو تفليقة قاعد ساكت ياعم شوفلك حلقة زار
إنت فاكر نفسك تقدر توصل مرة للطيار
يا عم فرنسى أتكلم عربى إن الله حليم ستار
فى السودان جند صيع خلوا الجو كله غبار
تركوا مبادئ العروبة تركوا عزة الديار
الإسلام فى قلوبهم صورة دمروها لا ازدهار
نسيوا إخوة العروبة مين هياخد القرار
هنيئا ليكم كاس العالم هنيئا لينا الإصرار
وهات لى ودنك يا عزيزى حط الإبرة فى الزرار
هأقولك كلمة حق فى ودنك علشان تبقى من الشطار
مصر تاريخها نبع عظيم مصر ذكرها الجبار
مصر أصالة مصر حضارة أرض سلام ليل ونهار
مصر مدت إيد العون لكل الجيرة صغار وكبار
دم ولادنا فى كل مكان شاهد حر على الأبرار
يمنى جزايرى كويتى وسورى وإلا نسيتم التتار
وفى حطين كنا أسود بين إيدينا السد انهار
اللى ينكر فضل المصرى قول عليه إنسان غدار
كاس العالم ليس الجنة ولا حرمانا منه نار
أرض النيل دايماً حرة أرض الخير يا مصر عمار
أرض الفتح أرض الأزهر أرض عبور لجيش جرار
ولا مليون أزمة تهز فى عزة بلدى أدنى جدار
كل تاريخ الدنيا يهون إلا تاريخ بلدى منار
عظيمة يا مصر عظيمة يا بلدى ألف حسرة عالديار
ألف حسرة عالعروبة كاتمة الصوت ضد التيار