العسكرى "محمد حسن عطوة" قصيدة جديدة للشاعر"سعيد شحاتة"

العسكرى "محمد حسن عطوة"
آخر شهادة نصر فى رمال السويس
آخر عريس اتزف من سينا
آخر ضلوع رافضه الخنوع والذلّ
رافضه الوجود للخاين المحتل
رافضه العلم لو مال فى راس التل
رافضه السكوت والموت ينسّينا
العسكرى "محمد حسن عطوة"
والخطوه فوق الجته أتقل م الجبال
لكن ثباتك فى الرمال شيمة رجال
شيمة الجمال الماشيه
تقرا الفاتحه وتصلّى الضحى فى الحرّ
شيمة جدع مؤتمن ملى للصبايا ومرّ
شيمة ممر احتله كام خاين
صدقنى يابه الدم مش هاين
والصبح باين على آخر مدى للشوف
يا اللى بظهورك قتلت العادى والمألوف
وأسرت قلب ألوف
خلّيت ضمير الوطن من طلّتك مكسوف
وقبلت تحلم بعيد وإحنا اللى نايمين خوف
دلوقت قادر أقول للى انحنى وسابك
التار جنابك بتاعه هناخده ع المكشوف
العسكرى "محمد حسن عطوة"
ابن التراب المصرى صوت الناس
ابن الغلابه اللى انحنوا بالفاس
ابن اللى حنى إيديه بطين النيل
وزرع ملامحه البريئه وحاكم النخاس
العسكرى "محمد حسن عطوة"
وكلامنا يا تراب مصر مش للبيع
مش للمحامى الحرامى وحبّة المساريع
ولا للى قالوا البلد وف قلبهم دودة
ولا للى وطوا وباعونا ف حفلة التطبيع
الكلمه زى السيف على الكداب
والنصر نايم تحت عقب الباب
وانا وانت يا محمد حسن أصحاب
من يوم إيدينا ما شالت القبقاب
ووقفنا بيه لمواجهة الجرابيع
العسكرى "محمد حسن عطوة"
"بلدى وإن جارت" أنا موافق ومش مضطر
ولا ناوى أبيع وأهرب مع اللى اتغرّ
أنا أموت كما محمد حسن عطوه
وأرقد فى رمل السويس خمسين سنه فى الحرّ
العسكرى "محمد حسن عطوة"
علّمتنا نحلم
علّمتنا نتوضى بالإصرار
علّمتنا نعيش فى الحياه أحرار
علّمتنا نتحلّى بالصبر المرار
لو أجبرونا على القرار بالنار
علّمتنا لمّا السما تمطّر
نِفحَت بدنّا ونتخلق أنهار
العسكرى "محمد حسن عطوة"
زفّوه لعرشه ف طوخ
واقروا لحبيبته العفيفه الفاتحة ع العفّه
وقولولها كان فارس بعزم القلع والدفّه
فلاح من الفقرا
وقّف جميع الدبابات بسلاحه ع الضفّه
حارب عشان العدل والكفّه
زفّوه لعرشه ف طوخ
ويا ريت حبيبته تجهّز الزفّه
العسكرى "محمد حسن عطوة"
بدأ التاريخ بالدمّ وهينتهى بالدّم
والروح هتفضل واقفه جنب اليمّ
تغسل وشوش اللى انخرس صوتهم
وتوطى راسها لكل دعوة أمّ
العسكرى "محمد حسن عطوة"
...... يا صرخه بتهزّ الجموح فينا
...يا أيها القابض على سلاحك
... يا ورد شايلينك على إيدينا
دمّك ما زال على كفّ سفّاحك
والحلم مقتول فوق كراسينا
يكفينى أعيش العمر مدّاحك
واحكيك هلالى لناس قهاوينا
العسكرى "محمد حسن عطوة"
آخر عريس اتزف من سينا
........ آخر إمام قام للصلا بينا