مرايتك فعيونى

علشان صورتى بتكمل بيكى
طول عمر مرايتك فعيونى
ومرايتى بشوفها فعنيكى
بتكملى فيا شىء منك .. مش بزهق منك أو أملك
الكلمة مقسومة ما بنا .. تقوليها .. واجى أكملك
فلماضة فضحك بنتشابه .. فمفاجأة جميلة بنتسابق
عن بعض نقرب وبنبعد .. لكن عمرنا ماهنتفارق
اتعصب .. تيجى تهدينى .. واما ازعل تيجى تراضينى
وخلاص تسبينى كده لما أهدى .. بعدها بتجيلى تعاتبينى
ليكى نظرة غريبة أما استعبط .. وبتقاسى كتير لما أنا أغلط
أوقات مش بعرف أبررلك .. أصل أنا قدامك بتلخبط
ليكى لحظة عقل فى جنونى .. وقرارك بقراه بعيونى
أصل الكلمة بينا بنظرة .. افهمها من غير ما تقوللى
فى حياتنا حاجات جد وتافهة .. وكمان فى حاجات فينا مختلفة
لكن المتعة إنك جنبى .. وفوقت الشدة ألاقيكى واقفة
شكرًا انك غيرتينى .. خليتى صورتى .. حلوة فى عينى
والحلو اللى موجود فيا .. سببه إنك كملتينى