أنا صيدلي داخل فى 22 سنة مشكلتى أنى ارتبطت ببنت من تانى سنة فى الكلية لمدة سنتين ونص تقريبًا، وكانت متعلقة بيا جدًا، وأنا كمان كذلك وكانت طيبة جدا و بتغير من نفسها عشان ترضينى دايماً المشكلة كانت فيا أنا مكنتش ناضج واستغليت الموضوع انى اضعها فى سجن دائم ما تعمليش ما تسويش البسى جيبات بدل البناطيل ما تحطيش مكياج ومحبذش الشغل بعد الكلية وتسلط كتيير أوى وهى كانت مستحملة بس فى نفس الوقت هى طموحة جدا وكان نفسها تعيش حريتها شوية ولكنها عمرها ما بينت ضيق وكان كله برضا وسماحة منها بس برده كانت نيتى ساعتها كانت انى اتربيت على كده ومش حابب تكون ملفتة للشباب المهم حصلت مشكلة ووالدها عرف الموضوع وزعقلها انها ما تكلمنيش تانى وكده غلط وهى كانت جابت اخرها وحكتله عنى فطبعا قالها انه مش بيحب الا نفسه وكرهها فيا اكتر ما كانت شايله واتقلبت عليا جامد وانقطعنا وبعديها حاولت كذا مرة ارجعلها بعد حوالى 3 شهور على اساس انها هدت انما تمسكت برأيها وانها كده خلاص مرتاحة وعايشة حريتها وبتلبس لبسها وعايشة زى مهى عايزة مرتاحة ومعدتش عايزانى المهم فضلت الح واكلم والدتها واختها لغاية ما والدتها زهقت منى فقالتلى خلاص كلم والدها وبالفعل كلمنى تانى يوم وقلتله انى ممكن اتقدملها فعلا فى الصيف وانى عايزها والفكرة اللى عنى انا غيرتها .. رفض تماما وادانى كلمتين حلوين انى لسه طالب وكده قلتله لو جيت بعدين تقبلنى قاللى تفكير الواحد بيتغير ولما نيجى ساعتها .. المهم قفلنا على كده وحسيت انه كده كده بيزحلقنى زى ما بيقولوا واختها بعد كده قالتلى لو كانت عايزاك كانت ضغطت على باباها انما شكلها فعلا خلاص وحاسة انك ما اتغيرتش بعد ما كلمتها تصالحها اخر مرة .. المهم بعديها فضلت مكسور وحاسس انى كرامتى ضاعت بعد المحاولات دى وحبيت اقف على رجلى قلت اصلح بقى الغلطات عشان لو فضلت كده هكتئب وفعلا قلت انا بقى هختار واحدة بمواصفاتى بالجيبات من غير مكياج وفى حالها واتقدملها مباشرة وكده اعيش سعيد واقف على رجلى تانى وفعلا اختارت واحدة بالصفات دى من دفعتى برده وخطبتها فى الصيف اللى فات وانا حاليا فى اخر سنة وسألتنى فى الاول هل اختارتها كبديل ورديت بصدق انه لا وانى حبيت اختار شخصية كويسة فعلا عشان اكمل معاها حياتى المهم فى الاول سريعا اجبرت نفسى اتعلق بيها بادرت بكل الكلام الحلو بالتجربة اللى كنت فيها كنت عايز اوصل سريعا لنفس درجة التعلق بتاعة الاولى وكنت ساعتها مقتنع ان احنا مرتاحين وانى بحبها فعلا والدنيا وردية مع الايام حسيت بفتور شديد وانى مش متلهف اكلمها زى الاول وانى مش بحبها ومش قادر والاولى بقت بتيجى على دماغى طول اليوم ومش قادر انساها وبهرب من انى اشوفها فى الكلية .. الواحد بعد ما نضج شوية حس ان العيب كان فيه وحس بالذنب من كل اللى عمله مع الاولى وان دى فعلا اللى كنت هبقى سعيد لو كملت حياتى معاها واتغيرت كتير فعلا وحاسس انى لو رجعتلها هسعدها جدا حاسس دلوقتى انى بضحك على نفسى وبضحك على اللى معايا هى اتعلقت بيا جدا جدا بعد وصلة المشاعر اللى انهلت عليها بيها فى الاول ودلوقتى حاسس ان القرار الامثل انى انفصل لانى مش مرتاح ولما بكلمها بحس انى بكلم واحد صاحبى مش قادر اعيش سعيد وفى نفس الوقت كل لما افكر خلاص الاقى منها رسالة حلوة تضعفنى وتحسسنى انى ظالم ومعنديش قلب خاصة كمان انى اهلى متعلقيتن باهلها جدا وهى بنت كويسة جدا جدا وقالولى كذا مرة ادى نفسك فرصة وابعد شوية وشوف هتشتقلها ولا لأ عملت كده ومفيش فايدة مش مرتاح خالص وهيبقى ظلم اكبر ليها وليا لو كملت معاها كده واجوزنا وبالفرض مثلت انى بحبها هكون عايش فى جحيم داخلى وحتى ده مش لانى بقارنها بالتانية بالعكس لبسها وحاجات كتير بالنسبة لى افضل الا انى حاسس انى متعلق بروح التانية عايزها كده زى ما هى ولو جتلى واحدة مثالية مش هتعوضنى عنها فانا بجد مش عارف اعمل ايه يا ريت تفيدونى سريعا عشان بجد مش عارف اركز فى اى حاجة صديقنا العزيز أنت بالفعل لسه متعلق بحبيبتك الأولي وزي ما خطيبتك سألتك انت خطبتها علشان تنسي بيها حبك الأول للأسف ، لازم تسيب خطيبتك لأنك مش هتقدر تسعدها خاصة انك بتقارنها بحبيبتك الأولي فانت كده هتظلمها وتظلم نفسك حتي لو هي بتحبك وهتتأثر بتركك ليها دلوقتي أحسن من بعدين و كويس ان انت عرفت غلطك فين وقدرت تصلحه وحاول توصل لحبيبتك الأولي وتعترف ليها ان انت عرفت ايه هي اخطائك وحلتها وان انت مش هتقدر تعيش من غيرها واطلبها تاني من أهلها لو رفضت تاني يبقي ساعتها حاول تنساها واعرف ان هي مش نصيبك وان الفتاه اللي القدر كاتبها ليك لسه مجتش وادعي ربنا يرزقك بالزوجة الصالحة اللي تكون في عينك كاملة وتكمل معاك حياتك زي ما بتحلم وتسعدك ان شاء الله ، بس بلاش تقع في نفس أخطائك القديمة " التحكم الزائد ، وإن أنت ترتبط بواحده لمجرد ان انت تنسي بيها غيرها"