قبيل الامتحانات.. طلاب الثانوية العامة يشعلون الغضب على "تويتر" بهاشتاج "علمونا صح".. ورسائل للمسئولين: "علمونا نفكر مش نحفظ".. وطالب: "علمونى فى المدارس أخد درس عشان أعدى وازاى أغش وأخد جهد مش جهدى"

دشن عدد من طلاب الثانوية العامة فى مصر على مواقع التواصل الاجتماعى "فيسبوك" وتويتر"، هاشتاج غاضب يعبر عن استيائهم من التعليم فى مصر، بعنوان "علمونا صح"، وسعى الطلاب من خلال هذا الهاشتاج أن يوصلوا للمسئولين عن التعليم فى مصر، المشاكل التى يعانون منها بسبب المستوى المتدنى من التعليم فى المدارس.
ومن أبرز التعليقات التى نشرها الطلاب: "أبسط حقوقى إنى لما أتخرج أحس إنى مضيعتش 18 سنة من حياتى من غير فايدة"، و :"لما المدرس يبقى مش طايق مهنته ودخلها غصب بسبب تنسيقه ويجى يعقد اللى جابونا يبقى جملة "قف للمعلم ووفه التبجلا" "دى تبلها وتشرب ميتها". "هستفيد إيه لما احفظ حاجة أنساها بعد اللجنة على طول، ليه يبقى كل اعتمادنا على الدروس الخصوصية والكورسات لما ممكن فى المدرسة والكلية يعلمونا صح".
وعلق طالب: يعنى إيه أذاكر وأكل الكتب واخش الامتحانات وعشان أنسى حاجة أو أغلط فى حاجة صغيرة من غير قصدى أنقص نص درجة تودينى كلية غير اللى كنت عايزها أو تودينى أسوان بدل ما أروح فى محافظتى!".
وأضاف تلميذ "كتاب المدرسة حاجة وكتاب الامتحان حاجة تانى خالص.. تحس إن الاتنين بيدوا منهج مختلف عن بعض!!"، وسخر آخر: "بناخد مناهج من أيام ما وزارة التربية والتعليم كان اسمها "وزارة المعارف "تعليم متعفن".
وذكر أحد الطلاب:"فقط فى مصر تلاقى واحد ممكن يبقى من أحسن الرسامين فى العالم وميعرفش يدخل فنون عشان مش شاطر فى العربى"، فيما علق آخر :"أنا كنت حالل سؤالين غلط فى امتحان الفيزياء فى تالتة ثانوى وسبحان الله برده جبت 50/50 ودخلت هندسة وخدت مكان واحد تانى فى الكلية".
وسخر آخر: "عندك امتحان إيه بكره؟ دين أومال بتذاكرى عربى ليه ..لا قشطة أصل الدين مش فى المجموع والعربى أهم، علمونا نفكر مش نحفظ".
ووصف طالب حال التعليم فى المدارس، قائلا: "علمونى أخد درس عشان أعدى، علمونى لما المدرس يهزئنى أسكت وأهدى، علمونى إزاى أغش وأخد جهد مش جهدي، علمونى أخد درس مع مدرس مادى، علمونى إزاى العلم فى دماغى يصدى، علمونى قبل الامتحان أكتب البرشام على يدى، علمونى النط من ع السور، علمونى أغيب لكن اسمى يتكتب حضور، علمونى أسكت وأسيب حقى مهجور، علمونى وفهمونى أن الشطارة إنك تطلع مهندس أو دكتور، لكن غير كده أبقى فاشل وطرطور، علمونى أحب بلدى وأنا بذاكر فيها من غير نور، وياللى قاعد ساكت قوم ابنك عليه الدور".