بيقولك.. إيه؟!

1- بيقولك شعار الحزب الوطنى لمؤتمره السادس هو (من أجلك أنت) - أو على رأى أستاذ فهمى هويدى من أجل سواد عيونك - أو على رأى عبد الحليم عشاااااانك يا قمر
2- بيقولك دعوة الوزراااا اليومين دول إيه؟ - ياااااااااا رب إحنا عارفين إن إحنا بنعمل بلاوى كتييير ولسة حنعمل بلاوى أكتر، بس ياااااااا رب استرها علينا ومتفضحناش لحد ما المؤتمر بتاع الحزب يخلص.
3- بيقولك قاله إيه بقى: حذار أشوفك فى مؤتمر الحزب..... أنا مخصمك
4- بيقولك الإعلام الحر سواء صحافة أو تليفزيون...... نقمة على المسئولين المهملين والفاسدين، ونعمة على المسئولين المجتهدين والصالحين.. ده إن وجد أصلا مسئولين مجتهدين
5- بيقولك فى اليابان لو حصلت أى مصيبة زى إللى المصايب إللى بتحصل عندنا كل يوم المسئول بينتحر-- لو المسئول انتحر عندنا أعرف إنه انتحر من إللى بيسمعه وبيقراااه فى الإعلام لو كان عنده دم أصلا - وتأكد أن انتحاره ملوش علاقه أصلا بالمصيبة إللى حدثت ووقعت بسبب إهماله
6- بيقولك تشير أصابع الاتهام فى حادث العياط إلى الجاموسة، وتبحث الحكومة حاليآ عن الاتجاه السياسى لهذه الجاموسة، وهل كانت تنتمى لأى حزب أو حركة، جعلها تفعل هذه الكارثة قبل انعقاد مؤتمر الحزب الوطنى بأيام معدودة........ وجار البحث
7- بيقولك كان فى أغنية زمان بتقول يا حضرة العمدة ابنك حميدة حدفنى باستافنديه --- يرضيك يا عمدة
دلوقتى بقى الأغنية بتقول إيه: يا حضرة العمدة ابنك عايز ياخد العمدية---- يرضيك يا عمدة عشان ابن عمدة
8 - بيقولك إيه لو أنت من فقراء هذا البلد، اعرف أنك تمشى فى طريق مسدود ولا تنتظر تحول مسار هذا الطريق، أما إذا كنت من الأغنياء، فأنت على الطريق السريع وانتظر المزيد والمزيد والمزيد.........؟
9- بيقولك إيه الأستاذ جمال مبارك، بيقول إن إحنا شعب ما بيحبش يتحرك - وأنا بقول إن دى ميزة وليس عيبا بالنسبة لكم كحزب حاكم على وجه الخصوص، لأنه لو تحرك هذا الشعب المطحون وبحث عن أبسط حقوقه الضائعة حتبقى مصيبة - خلى كده ساكن وصامت ومغلوب على أمره.... اسمع كلامى؟