مش لاقى اللى يحميك؟

غريب جدا وعجيب إنك مش لاقى اللى يحميك من سيارات النقل والميكروباس والتاكسى والملاكى اللى مالهمش فى السواقة ومعرفشى خدوا الرخصة إزاى ومنين (الله أعلم) متبهدل منهم تخبيط وتكسير مرة واحدة يكسروا شمال وفجأة يمين من غير إنذار غير العكسى واللى مايبصش فى المراية...... هيصه مش سواقة...... وفى لحظة ومن غير مقدمات تتسحب منك رخصتك فى رادار........ أنت ماشى يا أستاذ على 96 والمسموح 90....... طب يا باشا مافيش أى يافطة أو لوحة تقول كدة..... أنا ماليش دعوة هاتدفع ولا نسحب الرخصة... طبعا دفعت....بس الله طب كنتم فين وأنا بتداس من كل العربيات اللى بتكسر عليا يمين وشمال......مش عارف!!!!!!.
غريب جدا وعجيب إنك مش لاقى اللى يحميك وأنت ماشى فى الشارع من البلطجية.... طب إزاى هو فيه أى سيارة شرطة دوريه بتلف فى الشوارع اللى أنت بتمشى فيها..... أنت شفت حاجة كدة أو اتخايلت بسيارة دورية بتلف علشان تدى الناس الأمان وتعرفهم أنهم مايخافوش أنتم فى بلد الأمان .....اتحركوا براحتكم وامشوا فى الشارع ليكم الأمان ......هو فين الأمان؟......لو حد طلع عليك وههدك وقاللك هات محفظتك...وموبايلك...وساعتك ...وكل اللى معاك ...هاتعمل إيه هاتصرخ ولا تزعق ولا هاتديله اللى هو عايزة...طبعا هاتديله اللى هو عايزه وتشترى نفسك....ماهو مش خايف من حاجة.....وهايخاف من إيه....هو فيه حاجة تخوف؟...... نفسى وحلمى إنى ألاقى سيارات الشرطة تلف فى الشوارع كل الشوارع علشان نحس شوية بالأمان.