طراطير

نفسى أبيع ورشتى وافتح بتاع طراطير
زباينه يامه وشكله فوق دماغنا خطير
لايق على ابن البلد أبو قفل فى لسانه
وقفل فى دماغه وقفل فى لجنة التزوير
.....
ياريت نطوّر ونلبس كلنا زعابيط
تليق علينا وعلى مشيتنا جنب الحيط
ملناش إراده ولا بنسمع ولا بنشوف
وبلدنا متقسمة والأغلبية عبيط
.....
لو مش عبيط قولى مصلحطك فى بيع الغاز
مين منهم استأذنك من قبل بيع فنطاز
ومين قراره سيادى ضد مصلحتك
وليه شباب البلد محروم وفايته جواز
.....
لو مش عبيط قولى امتى راح يجيك الدور
وتلاقى نفسك بعلمك فى البلد مشهور
والحق غالب على أهل النفوذ والمال
وكل واحد شرب من دم مصر يغور
.....
من غير زعل كل واحد يشترى طرطور
فى الانتخاب يلبسه ويلف بيه ويدور
ويشوف لجان البلد فى اللجنة مين قاضى
ومين بقاله كام سنة فى اللجنة شاهد زور
.....
نفسى أصنع وابيع طراطيرى والبس
واهديها من غير ثمن لاشاوس المجلس
والبس على دماغى قدامهم سبع طراطير
واقول لشيخ النوّر بالنص يا اغلس