تفضل مجلس الشعب يتحل ولا لأ؟

محمود محمد -22 سنة
حل المجلس زى عدم حله، مش فارقة كتير، المشكلة إنهم هيحلوا المجلس من غير أى سبب منطقى، وفى الحالة دى يبقى الكلام عن إنهم عايزين المجلس كله يبقى وطنى حقيقى، وفى الحالة دى مش هقدر أقول غير «ربنا يستر على البلد».
عبدالعزيز سليمان - 49 سنة - بالمعاش
الأحسن إن المجلس يستمر لإن الشعب هو اللى اختاره، ولو حصل فيه تعديل أو اتحل يبقى لصالح الشعب برضو، مش لصالح الحكومة، وأتمنى لو جه مجلس جديد إنهم يهتموا بالناس شوية.. فيهم الفقير والعيان واللى مش لاقى شغل.
على ناجى - 49 سنة - خراط
فى الظروف اللى إحنا فيها دى مش فارقة يحلوا مجلس أو ميحلهوش، لأن اللى فى المجلس دلوقتى مش بيحسوا بالناس، ولا بمشاكلهم، ولو المجلس اتحل يبقى علشان يجيبوا أعضاء ميعارضوش ولا يتكلموا، ياريت البلد كلها تتحل وتتغير.. يمكن حالها يتحسن شوية!
عصام عبدالمحسن - 48 سنة - منتج تأمين
المجلس أصلا قايم على الغش والتزوير، يعنى حله زى عدم حله، بالعكس لو اتحل هييجى أسوأ منه، أنا كنت مرشح فى الدورة اللى فاتت عن حزب الغد، وشفت التزوير بعينى، وبلطجية الوطنى ضربونى، وفى الآخر سقطت والمجلس رفض كل الطعون، مجلس زى دا بقى حد يزعل على حله؟!
أبوسيف الجناينى - 33 سنة - شيف
الحزب الوطنى لو عايز يحل المجلس هيحله، ولو مش عايز المجلس يتحل محدش هيقدر يحله، خلاص يبقى يعملوا اللى هما عايزينه، بس يبعدوا عن الناس، وميرفعوش الأسعار.. ومش عايزين منهم أى حاجة.
إنعام محمود - 58 سنة - ربة منزل
الموضوع دا مش هيفرق معايا أو مع الناس فى أى حاجة، لو أعضاء مجلس الشعب كان عندهم ضمير ورحمة بالناس كنا قلنا ماشى، إنما هما مش حاسين بالناس، ولا بيعملوا حاجة لحد، أتمنى بس لو جه مجلس جديد إنهم يحاولوا يحلوا حتى جزء صغير من مشاكل الناس، كل بيت فيه ألف مشكلة بسبب الحكومة وقراراتها وانعدام ضمير اللى فيها.