قولوا لمعالى الرئيس

حِمل الرياسة تقيل
ضحك عليك إللى قالك خش سمى وشيل
أمانة حتى الجبال قالت ماحملهاش
وحضرتك شلتها ومش راح تنام الليل
...
ساعة الحساب التاريخ مش راح يسمى عليك
ولا الولاد راح تسامحك ودمها فى إيديك
خايف عليك من مصير حسنى وأمثاله
لا جماعة راح تنفعك ولا حد راح يفديك
...
ضيعت ليه فرصتك إنك تكون محبوب؟
وليه ركبت حصان الحُكم بالمقلوب؟
وإللى مشى فى موكبك الجهلة والكُهان
وإللى فى يوم طلعتك هيحدفوك بالطوب
...
يا خسارة لما الزمن يفتح إيديه الاتنين
وياخد بإيد اللى كان فى السجن من ساعتين
أخدنا مقلبين فى (مرسى) والإخوان
وعشر مقالب فى ناس اتمحكوا فى الدين
...
أمانة إللى يروح (الاتحادية)
ينصح معالى الرئيس بذوق وحنية
ويقوله حِمل الرياسة تقيل على سيادتك
سيبه لمجلس رئاسى يحمله شوية
...