قسوة الأبناء

بعد ما فات للعمر قطار أولادنا كبروا وسابوا الدار
راحوا سابونا نعيش وحدينا دا الوحدة ف كبر السن مرار
وقالوا مصالحنا بجد كتير شغل وبيت وكمان مشوار
محدش فينا فاضى يراعى والكل بيهرب منا فرار
وقالوا هنجيب ليكم خدامة تشوف طلباتكم ليل ونهار
محدش راضى يخدنا معاه وبعد دراسة شافوا قرار
جوَّا دار رعاية سابونا نسيونا محدش لينا زار
احنا قلوب محتاجة حنان مش محتاجة فلوس ودولار
نحس بطعم أمان فى الدنيا جنب عيالنا وهما كبار
لما ابنك يقسى عليك كل الحلم معاك ينهار
واللى يقول خلاص هيموتوا أمراض والعمر دا ليه أسرار
واللى ناسينا حتى ف عيد وعايز يقصف لينا أعمار
والى يقول الحمل تقيل والتانى واخدها يا سيدى هزار
أولاده ومراته يروح يتفسح واحنا فى سجن مالوش أسوار
واللى يقول قربنا نورث رصيد فى البنك وعزبة عمار
وبنت تقول جوزى وأولادى وقلوبهم قاسية علينا شرار
دا احنا لينا حقوقنا كتير رعاية زيادة واحنا كبار
يا ما عطينا العمر بحاله يا ما سهرنا وشيلنا صغار
ليه رافضين تردوا جميل؟ ليه رافضين تكونوا أبرار؟
لمَّا الأب وأم اتهانوا كل الدنيا هتبقى دمار