خايف!

خايف صيامى يضيع وانا دمى متعكر
خايف كمان من لسانى ينطق المنكر
وانا كان لسانى عفيف وقلبى كان ابيض
وكان كلامى جميل احلى من السكر
...
خايف اطيح فى الحكومه بكلمتين فارغين
اللى مفيش عندها ولا جاز ولا بنزين
مش لاقى حاجه اولع بيها فى هدومى
ولا عارف اشكى وافضفض من همومى لمين ؟
...
مركب وليها ريسين قالوا لازم تغرق
واللى بيظلط كتير لازم فى يوم يشرق
ياما نفسى اقطع ايدين اللى اخد حقى
وبقاله تلاتين سنه بيضل وبيسرق
...
حتى معالى الرئيس بقاله تلاتين يوم
وانا فى انتظار حضرته مبدقش طعم النوم
خايف قطار الرخاء يعدى ملحقهوش
وانا بقالى كام سنه من الرخاء محروم
امانه اللى يشوف (طنطاوى) او (مرسى)
او حد من عندهم قاعد على الكرسى
يبلغه ان انا فاضل يومين وهموت
ويبقوا يقروا عليه (اية الكرسى)