من المدرج: ايوا يا برايز .. الموقف اتغير دلوقتي !!!!

هذا الحوار يوضح لك عزيزي القارئ كيف تدار الكرة المصرية من خلال اتحاد الكرة ( ومن يديره من خلف الكواليس ) اللي هو ( برايز ) .
رئيس اتحاد الكرة : الو .. ايوا يا برايز .. احنا دلوقتي في موقف وحش جدا المنتخب اتغلب من السنغال في القاهرة وعايزين نص فرق القارة تلعب لصالحنا وبعدين احنا نكسب تونس .. نعمل ايه ؟
برايز : اهدا يا ابني مش كده ما تخفش كل فرق القارة حتلعب لصالحنا فعلا واحنا حنكسب تونس بس انت نفذ اللي حقولك عليه .
رئيس الاتحاد : ايوا .. قولي اعمل ايه بالظبط .
برايز : انزل للاعيبة قبل مباراة تونس وقلهم علشان خاطر شوقي غريب اكسبو تونس وبينلوهم انك متأثر ولو عندك اغنية من بتوع ( تسلم الأيادي ) او يا حبيبتي يا مصر شغلها واعمل نفسك بتعيط ؟؟
رئيس الاتحاد : تمام يا فندم .. وبعدين .
برايز : ما فيش بعدين كل حاجة حتبقى زي الفل بعد كده ما تقلقش .
بعد المباراة وهزيمة مصر من تونس كان هذا الحوار بين رئيس الاتحاد وبرايز .

رئيس الاتحاد : يا برايز .. اتغلبنا
برايز : ما انا عارف يا مصيبة ما انا كنت بتفرج !!
رئيس الاتحاد : طيب حنعمل ايه .
برايز : بص يا سيدي انت تطلع تقول البديل للمدير الفني للمنتخب حيكون اجنبي وارمي اسم مانويل جوزيه !
رئيس الاتحاد : اشمعنى يا برايز ؟
برايز : انت حتسأل كمان ؟؟ مش مهم افهم يا ابني .. احنا زي ما انت عارف ما ينفعش نقول ان احنا خسرنا علشان احنا ( لا مؤخذة ) فشلة .. لا طبعا احنا لازم نشيل حد الليلة وهو اصلا شايلها لوحده مش محتاج حد يشيلهاله ما شاء الله عليه .. المهم بقى نلهي الناس يا معلم .
رئيس الاتحاد : نلهي الناس ؟ اه ديه الخطة القديمة بتاعتنا وبتاعة نظامنا صح ؟
برايز : الله ينور على اهلك .. هي الخطة القديمة بتاعتنا وبتاعة نظامنا .. انا في السليم واي حد تاني ابن ستين في سبعين ... واحنا بقى اللي حننقذكم من الفاشل اللي كان بيدرب منتخب مصر وحنجبلكم واحد انتوا عارفينه وهو عارف الكرة المصرية وهو اصلا مصار جدل رهيب بين الصحفيين فكله بقى يقعد يتكلم عليه وينسونا يا معلم !!
رئيس الاتحاد : اصلي يا برايز
برايز : أمال انت فاكر ايه يا ابني .. احنا واكلنها والعة .
رئيس الاتحاد : طيب ولو حد من العيال بتوع النت او الصحفيين اللي دمهم حامي دول جاب سيرتنا وفضل يلسن علينا حنعمل ايه ؟
برايز : طلعلهم المتحدث الرسمي باسم الاتحاد بتاعك يقول عليهم شوية صيع وعيال بتوع ثورة يناير او اخوان او يلبسهم أي مصيبة اهو بيعمل ظيطة ويشتم وخلاص انت حتغلب يعني في ديه ؟
رئيس الاتحاد : أصلي يا برايز .
برايز : بقولك ايه .. انت حتعمل ايه في انتخابات مجلس الشعب ؟؟
رئيس الاتحاد : راشق يا باشا .. ده بعد اذنك .
برايز : لا قشطة يا ابني توكل على الله .. مبروك عليك المقعد يا برنس
رئيس الاتحاد : وعليك يا باشا
برايز : لا انا مش ناوي ..
رئيس الاتحاد : ليه كده يا معلم .. ده انت المعلم الكبير بتاعنا .
برايز : لا اصلي بحب العب من الكواليس .. بتبقى احسن .. ثم انت عندك انت والمتحدث الرسمي بتاعك وشوية اعضاء نازلين الانتخابات .. اظن انتو كفاية .. تخربو أي حاجة موجودين فيها .. هاهاهاهاهاه
رئيس الاتحاد .: هاهاهاهاهاهاهااها
برايز : اقفل السكة يا ابني ربنا يوفقكم ويوفقنا الى ما فيه خراب هذه البلاد .
رئيس الاتحاد : امين يا رب.