المعلم هريدي: حزمة بصل أخضر وفسيخة لكل مواطن مجانا!

صاحب الوكالة المعلم هريدي- الله يعمر بيته- أعلن عن تبرعه بحزمة بصل أخضر وفسيخة لكل مواطن وخمسة ترغفة، وتم افتتاح أكشاك للتوزيع في جميع مدن وقري مصر، وقال هريدي:وكله ده ليه عشان نرفع المعاناة عن المواطن الغلبان عشان ما يبصش للأغنيا اللي واكلينها والعة..أنا مع الغلابة..مش زي الممثل اللي بيقول أنا واحد منكم وهو عايم على وش الفتة وبيلبس بدل مستوردة وبرفانات من باريس..ومعاه حرس وعربيات بنشوفها في الأفلام..الراجل ده جاب الفلوس دي منين..والا اللي عامل سي دي لكل مواطن وبيقول له:أن ما انتخبتنيش هاعلم عليك وأفضحك فضيحة المتطاهر في المولد..أو زي ناس تانية معاهم فلوس بالشوالات والعدايات سرقوها م البنوك وغرقوا البلد في فساد مالوش أول من آخر..
وأنا زي ماقولت قبل كده مش هارشح نفسي في الانتخابات.. مش هاعمل زي المتعوس وجماعته اللي حلفوا ع المصحف وفي الآخر لبسوا الناس العمم وفاز المتعوس بالتزوير والسلاح الآلي..أنا راجل شريف وباكل من عرق جبيني..وده الفرق بيني وبين الناس اللي مالهاش أي تلاتين لأزمة دي..وسلامووووووز!