نفضولى ونفضونى

عيد سعيد.. هذه الجملة لم يعد لها تأثير ولاَّ أقل لنفسى يوم سعيد ما هو العيد هيجى منين؟ العيد عندى زمان كان أحسن عشان فيه هدوم جديدة وعيدية وبمب وصواريخ وبعد الجواز بيعدى علىَّ أول عيد من غير ما أشترى لبس العيد، لأنه عندى هدوم كتير، والعيدية مش هااخدها غير من جوزى وماما وبابا وبس، حتى البمب والصواريخ مش هفرقعهم مش عشان أنا كبرت على الكلام ده أو عشان خطر على العين زى ما بيقولوا لكن عشان اكتشفت أن البمب يعنى «فلوس على الأرض» وعلى رأى المثل اللى معاه قرش محيره يجيب بمب ويفرقعه، العيد السنة دى مختلف بالنسبة لى جدا، فعلى الرغم أنه جاى فى شوال زى ما هو وهقضيه فى بيت العائلة كالعادة وهناكل فسيخ وكحك زى كل سنة إلا أن التغيير حصل بجوازى فأنا الآن مسئولة أدى العيال الصغيرين عيديات بلا تعويض يعنى من الآخر محدش هايرد لى العيدية من أهلهم زى زمان وبدل ما كنت باخد عيديات من خالى وخالتى وعمى وعمتى، السنة دى هما هينفضولى لأنى بقيت متجوزة وولادهم هينفضونى وهياخدوا كل الفلوس اللى معايا خصوصا أن عيلتنا فيها 20 طفل يعنى لو كل واحد خد 20 ج يبقى 400ج عيديات لو أعرف وأنا صغيرة إنى هرد لما أكبر مكنتش فرحت بالعيدية ولا خدتها من أصله.. ده أنا ولا كأنى بسدد سلفة من البنك بس خلاص هانت بكرة لما أخلف، ولادهم هيردوا لولادى وأنا أحجز على الفلوس اللى مع ولادى بس تبقى مصيبة لو كل العيال دى جاتلهم شوطة البطالة ومحدش اشتغل هتبقى العيدية بتاعت ولادى راحت عليهم، إيه ده أنا بدور على عيديات ولادى من دلوقت..؟ مش لما أشوف الأول هعوض خسارة العيديات دى منين؟! أجمل حل أنى هاجمع اللى باخده كل سنة وأكتبه فى ورقة لجوزى وهو يدفع مش هو السبب إنى أتمنع من العيدية السنة دى؟! ولو على طلبات البيت والأكل مش عايزة الشهر ده أدينا نهضم أكل رمضان.