«محسوب» يجامل «المعزول» ب«تدوينة انتقام» من النظام.. «الصناديق مبتجبش معصومين ولا أفضل الخلق».. الدكتاتورية سبب مشاكل مصر.. ولو عايز فعلا تحقق حلم بلد عصري لازم نستعيد الديمقراطية من «الانقلابيين»

استمرارًا في الغيبوبة التي يعيش فيها مؤيدو الرئيس المعزول محمد مرسي، ودعواتهم المتكررة للخروج على النظام الحالي، واصل الدكتور محمد محسوب، نائب رئيس حزب الوسط، الهارب إلى قطر، هجومه على حكومة الدكتور حازم الببلاوي، منتقدًا إياها لنفس الانتقادات التي كانت توجه للرئيس المعزول.
وقال محسوب على صفحته بموقع فيس بوك، تحت عنوان "إحنا رايحين على فين؟": "عايز البلد تبقى حضارية وتتخلص من كل العشوائيات.. والناس تعيش في بيوت آدمية ويبقى عندنا شبكة مواصلات حديثة.. مترو وترام وأتوبيسات كافية ونظيفة ولها طرق ثابتة وتوصل بالثانية.. وتحول شارع صلاح سالم لشانزليزيه الشرق.. وتبقى مراكزنا وقرانا تتنافس في التنظيم والجمال وتيسير معيشة الناس.. ويبقى فيه دولة فعلا تضمن للناس حياة كريمة وتوفر العمل لكل واحد؟!".
وأضاف محسوب: "لو عايزها كده.. هل فاكر إن اللي بيحصل ممكن يوصلنا لكده؟ تبقى مش فاهم لإن اللي بيحصل تكرار للي بدأ من ستين سنة.. رفعوا شعارات كتيرة.. أولها تكريس حياة ديمقراطية سليمة فتكرست الدكتاتورية.. وثانيها عدالة اجتماعية فحلت الطبقية وبقيت مصر ثروتها بإيد أقل من 5% من سكانها..".
وتابع: "لو عايز فعلا تحقق حلم بلد عصري يكون لكل أبناء شعبه يبقى لازم تعمل حاجة جديدة.. لازم تستعيد الديمقراطية اللي فقدتها بالانقلاب.. هم خوفوك إن فيه حزب حكم.. وجماعة بتستأثر.. طب اسأل نفسك.. هي الديمقراطية إيه؟.. الشعب يختار مجموعة يحكموه.. لو نجحوا يختارهم تاني.. لو فشلوا يغيرهم في نفس الموعد بنفس الطريقة.. لأنه لو سمع كلام اللي بيقولوا: لا لا.. لو مش عجبك بعد شهر اخلعه بالمظاهرات.. يبقى مش ها يعيش للشعب حاكم يختاره.. وها يعيش بس الحاكم اللي بيفرض نفسه بقوة السلاح.. ودا اللي حصل..".
واستطرد محسوب قائلًا: "بلاش تقولي دا اللي اخترناه أخطأ وأخطا.. لإن الديمقراطية ما بتجبش معصومين ولا أفضل الخلق.. لكنها بتضمن ليك إنك تشارك وتنتقد وتسقط اللي مش عجبك.. كمان الديمقراطية مش علشان دا يحكم ولا دا ما يحكمش.. دي علشان الشعب يختار مش ينفرض عليه.. والأهم من ده إن أهل الحكم يتبعوا شعبهم ويخدموه.. مش يستعملوه ويستغلوه ويحتقروه.. وبعدين ف السجن يرموه..".
وواصل: "وعلشان تبقى موازنة الدولة بكل قرش فيها.. بما فيها فلوس القضا والجيش.. تحت نظر الناس وبتتناقش علني.. متقولش أموال الجيش سر حربي.. لإن أكبر جيش في العالم بينقشوا ميزانيته علنيا.. وعلشان ما تجيش سلطة تحاول تقسم الشعب لشعبين.. شعب معاها وشعب يستحق الموت.. وعلشان.. وعلشان.. منقولش.. آه مرسي حكم سنة.. ولا شفنا المواصلات ولا الحضارة ولا الشانزليزيه.. لا يا عمنا.. البلاد بتتطور بالتراكم.. علشان كده عملوا مدة للحاكم وللحكومة علشان ياخد فرصته ويبين كرماته.. ودلوقتي.. عايز تعطي للانقلاب فرصة؟! طب ليه لم تعط للديمقراطية فرصة؟!".
وقال محسوب: "الانقلاب ها ياخد الفرصة علشان يرسخ قيمه.. القمع للمخالف.. وتكوين شبكة الفساد اللي بيعتمد عليها واللي انت خبرتها.. وتعليم الشعب الخوف من الكلام أو النقد.. بعد كده.. لا ها تقدر تقول دا حلوا ولا ده وحش.. ولا ها تقدر تقول صرفتوا كام ولا فلوسنا فين.. من النهاردة ماقدرش.. وإلا وريني شجاعتك كده!! لسة الفرصة قدامك.. الانقلاب هش.. لساه انقلاب ولسة إيده ملونة بلون الدم.. قبل ما يغسل إيده ويخلع بدلته ممكن تفكر تاني.. إحنا رايحين فين؟".