"رحمة.. على بُكرة اللي مات" شعر ل" فاطمة المرسي"

ياعُمرنا المشحون سفر
مهما تهاجر أو تعافر
أو تتوه
تفضل كده مربوط بأحبال القدر
إوعاك في مرَّة تفتكر
إن الهروب رح يمنحك
فرصة تحقق حلمِنا
ياعمرنا المفتون بأوهام البعيد
غرَّبت ليه قبل الأوان
ورفضت لما الخُوف يزيد
إنك تبان
ياعمرنا الغافي على كتف السحاب
ليه كل مرَّة بتنجرح
تهرب بسرعة من الحياة
وتخاف تعود
وتسيب جراحك كلها
عايشة هِنا
ونهار ما تيجي تطل
ع الجرح الغويط
بتلم أوراقك وترحل من جديد
إنت عبيط ؟
والا الصحيح شكلك كده
سُقت الهبل ع الشيْطنة
مع أي غلطة صغيَّرة
تجري على الغيمة البعيدة وتختفي
وشوية تتسرسب مطر
نازل يدوّر ع الهنا
ياعمرنا
إهدىَ.. كفاية شيْطنة
كل اللي باقي لينا فيك
لو يوم شقا أو يوم لقا
مكتوب لِنا
لو رُوحت في ألف اتجاه
حتما حنتقابل معاه
فبلاش جنون التغريبات
نُصَّك الضايع ميلاد
ونُصَّك الآتي ممات
بين البينين
كام رف فيه الذكريات
كل السنين الفايتة معجونة بأنين
وامَّا اختمر شكل العجين
إتوزَّع العيش اللي طالع م السنين
رحمة....
على بُكرة اللي مات