يوميات أم مفروسه الحلقة التاسعة // كله بيعدي بقلم رنا هاشم

أوضة كبيرة سقفها مرسوم بحر و سما و نجوم شباكها بيتفتح و بتدخل نسمة
صبح حلوة و خيوط شمس دافية بترسم حب و نغم على وش الجميلة اللي بتصحى من
النوم
صباح الفل يا حبيبتي
صباح الخير يا ماما
وشك تعبان أوي يا حبيبة ماما
معلش هبئا كويسة
وأخرتها يا ريم
ريم تبدأ بالنحيب
وتترمي في حضن ماما
مش قادرة يا ماما
والله لو قادرة كنت نسيت
لو قادرة أداري كنت داريت
ضايعة و تايهة نفسي أشيله من قلبي, نفسي أنسى صوته , نفسي أنسى
طريقته وهو بيقول بحبك , عارفة أنه غلط اللي أنا حاساه بعد كل اللي عرفته
عنه وعارفة أن مش بيحبني ولا عمره حبني وأني حكاية من بين الف حكاية عنده
محطة قطر وصلها في يوم حر حب يبل ريقه بشويه مايه , ورجع يكمل طريقه من تاني ..
بس مشي وخد من جديد قلب مكسور معاه
ليه يا ماما بيدوا لنفسهم الحق يجرحوا ويجرحوا ويدبحوكي بسكينة تلمة
ليه معتبرين أن لهفتنا عليهم شيء مسلم بيه ولما تتناقشي عن مشاعرك مع
حد يقولك تستاهلى ما انتي اللي عملتي في نفسك كده
وده ليه ؟؟
لأني تجرأت على فعل الحب
يا ساتر
الاقيها من نكبتي وصدمتي في اللي حبيته ولا من ناس تافهة ما ورهاش
الا الحلال والحرام وهما نصهم ان مكانش كلهم اللي بينصحوا فيا أقنعة
مزيفة من الصح اللي بيضحكوا بيه على الناس
يا ماما انا مش حالة شاذة
انا حالة من الف و ألف حالة حصلها وبيحصلها وهيحصلها كده كل يوم
لكن وجعي انا اللي حاسه بيه دلوقتي مش الناس
مش عاوزة حاجة ولا أيد تمسح الدمعة من على خدي
ولا حد ياخدني للبحر و يعدي
بس محتاجة حضنك يا ماما يداويني و يهدي
يخلي الآيام ترمح و تجري
بحبك يا ماما
نظرة دامعة من عين ماما في وش الجميلة
و نفسها تقولها كلنا اتوجعنا يا بنتي
بس والله الأيام بتعدي
مش هننسى لكن مش هنموت بتقولها بقلبها بكل حنان
وتاخدها في حضنها
ومن الجهة الأخرى
ماما بتقلب شفايفها بكل أزدراء
و بتتوعد وتسب و تلعن أبو الرجالة أللي مكفرة عيشتنا
مش حاجة تفرس ؟؟