أنا عاوزة آخد رأيكم في موضوع وأتمنى تردوا عليّ بسرعة؛ لأني حموت، أنا كان لي واحدة صحبتي من 5 سنين أعرفها كنا كل حاجة بنعملها مع بعض حتى كلامنا بقينا بنقول الكلام هو هو في نفس اللحظة، وكل اللي يشوفنا يقول إننا استحالة نكون أصحاب وإحنا أكيد إخوات؛ لأننا شبه بعض أوي. المشكلة إني اتعرّفت على شاب وحبيته وهي اتعرّفت على ابن خالته، المهم ماما عرفت بحكايتي مع الشخص ده وعملت مشاكل جامدة معايا وضربتني، وأنا طبعا حكيت لها وهي راحت قالت لابن خالته، وكنت مكسوفة جدا ومستغربة لما عرفت، ولما سألتها عيطت، وقالت إنها وقعت بالكلام بس أنا عارفاها كويس دي كل كلمة بتقولها بحساب، هي كمان عاملة مشاكل مع ناس قرايبها معانا في الكلية وكلهم قعدوا يقولوا لي إنها بتغير مني وإنها مش بتحبني، الصراحة أنا ما خصمتهاش وقلت لها ولا كإن حاجة حصلت، بس هي اتغيّرت وأنا كمان، وكلامنا قل وتقريبا ما بقناش نكلّم بعض، ولما نشوف بعض بنتعمّد نحرج ونضايق بعض.
المشكلة إنها بعد كده عملت حاجات ضايقتني وما قدرتش إني أسامحها بس أنا بحبها أوي وخلاص حتخطب ومش حاسة بفرح من غيرها، حاسة إنها جزء مني حتى لو مش بتحبني باحس إنها أختي مهما عملت لازم نرجع تاني، أنا قلبي بيوجعني لما باشوف صورنا مش متخيّلة الصداقة الجميلة دي تنتهي، إحنا عمر ما حد قدر يدخل بينا، بس مشكلتها إنها استحالة تعترف بغلطها، والصراحة مش قادرة أنا أبتدي بالكلام معاها بس نفسي تيجي فرصة نتكلّم وحسامحها وحعيط في حضنها زي ما كنا بنعمل دايما لما تحصل معانا حاجة، وحشتني أوي، وعلى فكرة هي ما بقتش تكلّم الولد ده وأنا طبعا سبت اللي كنت مرتبطة بيه؛ لأنه كان موضوع أهبل وأنا خلاص حتخطب.. آسفة إني طوّلت يا ريت تساعدوني.