كنباوي وكنباوية.. حلقة رقم (118).. الإخوان لا يعترفون بكنائس ولا مساجد!

كنباوية وكنباوي لم ينما ليلتهما أمس فقد ظلا ساهران أمام شاشة التليفزيون يتابعان ما يحدث في مسجد الفتح باهتمام بالغ حيث كان يختبئ نحو خمسمائة إخواني وبلطجي ممن أطلقوا نار ورصاص على المارة من الناس ورجال الشرطة والجيش في ميدان رمسيس وقاموا بإحراق مبنى المقاولون العرب وبنك الدم وسيارة الحماية المدنية وهرعوا إلى الاختباء والاحتماء بمسجد الفتح محتجزين بعض الأطفال الصغار والنساء وكان على رأسهم القيادي الإخواني سعد عمارة.
كنباوية: ياه ياكنباوي أنا قايمه من النوم جسمي مكسر أوي وحاسه بوخم وكسل غريب وعمالة أتاوب
كنباوي: ده طبيعي ياكنباويه احنا نايمين بعد أدان الفجر بساعه تقريبا يعني الساعة أربعه ونص وصاحين الساعه 9 يعني مالحقناش ننام ولا لحق جسمنا يرتاح وياخد كفايته من النوم وكل ده علشان خاطر الإخوان المقرفين وبلطجيتهم وإرهابهم
كنباوية: طيب قوم افتح لنا التليفزيون نشوف خرجوهم من الجامع ولا لسه
كنباوي: ياوليه ده احنا لسه على غيار الريق مابلناش ريقنا حتي بلقمه مش معقول نصطبح بالإخوان اكيد لسه بيطلعوهم وهمه معصلجين ياكنباويه طول ما معاهم قيادي من القيادات حيحموه علشان مايتقبضش عليه لأنهم عارفين أن ده أول واحد مطلوب
كنباوية: بس دول ناس اتنزعت من قلوبهم الرحمة علشان يعملوا كده ويدنسوا بيوت الله بجزمهم وأسلحتهم
كنباوي: انتي بتحكي في ايه هي الكنائس اللي حرقوها اللي عدت 67 كنيسة في كام يوم مش بيوت ربنا برضه؟
كنباويه: ايوه على رأيك ما الكنائس بيوت عبادة لدين نازل من السما مش همه مخترعينه من عندهم بغض النظر بقي عن أي شيء تاني كل دين وفيه حاجات بيفسرها أصحاب الدين ده على هواهم زي الآيات اللي بيفسرها الإخوان على مقاس أطماعهم ومطالبهم
كنباوي: اديكي حطيتي إيدك على مربط الفرس وجبتي التايهة الإخوان كانوا بيفسروا الدين الإسلامي على مزاجهم ووفق أهوائهم دول ضحكوا على المصريين باسم الدين واتغشينا واتخدعنا فيهم شوفتي بيعادوا علينا الغرب ازاي وشوفتي أردوغان المتخلف اللي بيطالب مجلس الأمن بتدخل عسكري في مصر طيب مايتجنن ويحاربنا احنا
كنباويه: هو ممكن يفكر في كده ؟
كنباوي: كل الإخوان مجانين وانتظري منهم أي شيء بس على الباغي تدور الدوائر لا تركيا ولا أمريكا ولا أي بلد كانت حتى لو كانت قوة عظمى ماتقدر تمس مصر اللي اتذكرت في القرآن والرسول قال عليها إن فيها خير أجناد الأرض وادخلوها بسلام آمنين مصر اللي ربنا كلم موسى فيها البلد الوحيدة اللي اتشرفت بصوت الله سبحانه وتعالي محمية ليوم الدين رغم أنف الأمريكان والأتراك والقطريين وكل الحاقدين
كنباوية: شوفت ياكنباوي السوريين والأفغان اللي اتقبض عليهم مع الإخوان ؟
كنباوي: ايوه شوفت دي حاجه قليلة الأدب بعيد عنك لما يستأجروا ناس لأمن بلدنا ولا عايشين معانا علشان يموتوا أولادنا ويحرقوا البلد دول خلاص عيارهم فلت ومبقاش يقدر يردهم غير الردع
كنباوية: يستاهلوا كل اللي بيعمله فيهم عساكر وضباط الجيش والشرطة ورجالة العمليات الخاصة دول الإعدام قليل عليهم بهدلوا البلد ووقفوا حالها وخلوا الحكومة تفرض علينا حظر التجول وعذبونا معاهم وقعدونا في بيوتنا من المغرب وقفلوا محلاتنا وقطعوا أكل عيش ناس كتير الله يخرب بيوتهم زي ماخربوا بيوتنا.
كنباوي: ربك عادل منتقم جبار حيخلص منهم اللي عملوه في المصريين ربك يمهل ولا يهمل
كنباويه: ونعم بالله ياكنباوي بس أنا حزينة على المساجد دول بيقولوا إنهم كانوا عاملين غرفة إعدام في مسجد رابعة العدوية وفيه مشنقة هناك كانوا بينفذوا حكم الإعدام على اللي مش على هواهم.
كنباوي: بكره فيهم اللي حيتعدم واللي حيقضي الباقي من عمره مسجون ومعتقل كما تدين تدان الحكاية مش سهلة ولا سبهللة البلد دي فيها قانون عادل كل من أخطأ حياخد جزائه وحيتعاقب بما فعل
كنباوية: نفسي زي ماقبضوا على سعد عمارة ومحمد الظواهري يقبضوا على البلتاجي والعريان وصفوت حجازي والمرشد بديع ومحمود عزت ومحمود غزلان علشان يبقي قضينا على رؤس الفتنة والفساد والإرهاب اللي في مصر ياكنباوي
كنباوي: حيحصل ياكنباويه وحيقبضوا عليهم الداخلية والأمن الوطني مش نايمين ومعاهم كمان المخابرات الحربية بس العملية محتاجة وقت أيام قليلة وتسمعي أخبار حلوة تشرح قلبك وقلوب المصريين كلهم
كنباوية: يارب ياكنباوي، يسمع منك ربنا ويحقق لنا اللي أنت بتقوله
كنباوي: حيسمع ويحقق لأن ربنا عارف اننا ماظلمناش الإخوان وهمه اللي ظلموا نفسهم وظلمونا معاهم ربنا كريم وبيقف جنب الغلابه المظلومين واحنا اتظلمنا مع المفسدين الاشرار دول اللي مايعرفوش غير الإرهاب والقتل والخراب
كنباوية: أنا واثقه من رحمة ربنا وعدله وانتقامه من الإخوان والصابرين بخير
كنباوي: ايوه كده الصابرين بخير قومي بقي فطرينا انا عاوز افطر فطير مشلتت وعسل اسود وعاوز بيض مقلي باسمن بلدي ووقشده فلاحي
كنباويه: ايه ياكنباوي انت بترضع ياخويا ولا ايه ؟
كنباوي: عيب ياكنباويه تقولي ياخويا بصي لبطنك المنفوخه وانتي تعرفي اني مش اخوكي وبعدين انا قايم نفسي مفتوحه بلاش ااكل ؟
كنباويه: ربنا يفتح نفسك كمان وكمان وبالهنا والشفا ومطرح مايسري يمري وألف صحة وعافية على بدنك نص ساعة وطلبك يكون جاهز هو أنا ليا بركه إلا أنت ده أنت سيدي وسيد الناس.
كنباوي: اهه انا شبعت بالكلمتين الحلوين دول وكأني أكلت خروف يسلم فمك ياكنباوية
كنباويه: وتسلملي ياكنباوي من كل رضي!