"وقوع البلا ولا انتظاره".. نشطاء "الفيس" يسخرون من فض اعتصام مسجد الفتح.. نجلاء: الإخوان حالفين ليطلعوا روح اللي خلفونا.. أيمن: الشرطة بتعذبنا ولا بتعذب المعتصمين.. ناصر: انجزوا بقى عاوز أنام

أثار طول انتظار فترة فض اعتصام بلطجية الإخوان وإرهابيي الرئيس المعزول محمد مرسى بمسجد الفتح برمسيس سخرية نشطاء موقع التواصل الاجتماعى "فيس بوك"، خاصة أن المشاهدين انتظروا لساعات طويلة أمام شاشات التليفزيون دون جدوى، كما أن المذيعين أصابهم الإعياء والإجهاد، وخاب أملهم فى الحصول على شرف متابعة عملية الفض "أون لاين".
نجلاء سعيد كتبت على صفحتها: "الإخوان حالفين براس الشياطين ليطلعوا روح اللى خلفونا.. الاعتصام بتاع جامع الفتح هيخلص ازاى".
أما هيثم محمود فقال: " عمري ما شفت الشرطة بتاعتنا حنينة وطويلة البال كده.. الشرطة عمالة تتحايل على المعتصمين في مسجد الفتح من أول الليل عشان يمشوا مفيش فايدة.. وقالولهم عايزين نصلى الفجر وسابوهم يصلوا الفجر تلات مرات.. وبعدين قالولهم مش ماشيين إلا لما تنتهي ساعات الحظر الساعة ستة.. وعقيد القوات الخاصة كيوت قوي بيقول همه بيكبروا في وشنا ليه هو إحنا كفرة؟ حاسة إن التنظيم الدولي راشش رشة جريئة على الداخلية والفيلم ده حينتهي بهرج ومرج يهرب خلاله سعد عمارة".
وقال ناصر سعيد " انجزوا بقى يعني أذنتوا الفجر قبل موعده بساعة وفوتناها لكم.. صليتوا الفجر 3مرات وعدناها.. رشيتوا من طفاية الحريق وقلتم قنابل غاز وعادي سكتنا لكم.. كده كتير يا تخرجوا يا إما ندخل لكم".
وكتب أسامة حماد "الناس لسه بتتريق على اقتحام مسجد الفتح.. مع إن 32 من علماء السعودية أفتوا بإباحة ذلك وتم اقتحام المسجد الحرام عام 1979 بعد ملئه بالماء وتم صعق من فيه وألقوا غازات سامة وعطلت الصلوات فى المسجد الحرام حتى تم تطهيره من جهيمان المتطرف وأنصاره.. إنتو مستنيين إيه".
محمود محمد قال "الهدف من التمترس فى المساجد بالمنصورة والإسكندرية والقاهرة هو توصيل رسالة مفادها إنه لم يغلق مسجد فى عهد مرسى.. عهد الأمن والأمان والإسلام بينما المساجد تنتهك بعد عزله.. رسالة إلى كل المغيبين.. فوقوا بقى".
أما محمود عبد الرازق فكتب على صفحته "وائل الإبراشى كان ناقص يسب الدين للإخوان ويقول لهم يا ولاد التيت خلصوا بقى عاوز أنام".
وعلق حمزة أحمد قائلا: "الأمن ناقص يبوس إيد المعتصمين عشان يخرجوا.. هو مستنى إيه.. يكونش مفتاح فض الاعتصام ضاع منه.. أو يكونش نسى الباسورد.. لا تخرج قبل أن تقول سبحان الله".
أما محمد أيمن فقال "نمت وصحيت 3 مرات.. وكل مرة أسأل هو الاعتصام انفض ولا لسه؟.. يقولوا لسه.. الشرطة فاهمة غلط.. كده بتعذب المشاهدين مش الإخوان".