كنباوية ليست فرحة بفض اعتصامي رابعة العدوية والنهضة وليست مستاءة من فضهما أيضا أنها تمر بمرحلة بين بين فرحة فرح نسبي بالغمة اللي انزاحت عن المصريين وسكان رابعة ومدينة نصر وبين السرايات وحزينة لما شهدته مصر اليوم من خراب على أيدي الإخوان الذين قالوا بأفعالهم يافيها يا اخفيها وانا ومن بعدي الطوفان.. كنباوي يقترب منها في محاولة منه للوقوف على حالتها ومعرفهة مابداخلها من مشاعر مضطربة. كنباوي: ايه الاخبار اهه الاعتصامات اتفضت ارتحتي بقي ؟ كنباوية: ومنين تيجي الراحة والإخوان حولوها لحرب شوارع نزلوا المهندسين وجامع مصطفي محمود ضربوا نار على ضباط الشرطة وضربوا نار في رابعة وحرقوا اكتر من 8 اقسام شرطة واكتر من 4 كنائس ومدارس يسوعية ونازلين قتل وسلب ونهب وسرقة في مخاليق ربنا دول حرقوا قسم كرداسة وموتوا المأمور ونائب المأمور و2 ضباط و7 أمناء شرطه وعساكر فيه ايه اكتر من كده ؟ كنباوي: دول وقفوا حال البلد المحال والشركات والمصانع قفلت أبوابها طول اليوم كنباوية: وكمان الداخلية بالتنسيق مع الجيش فرضوا حظر التجول في اربعتاشر محافظة منهم القاهرة والجيزة والإسكندرية والسويس والاسماعيلية وبني سويف والمنيا وسوهاج وأسيوط والبحيرة وشمال وجنوب سينا من 7 مساء لحد 6 صباحا الناس قعدت في بيوتها ياكنباوي والشوارع بقت فاضيه بتهش وبتنش لاناس ماشيه فيها ولا محال فاتحه يعني نظام قطع ارزاق مستعجل شوفت اللي نابنا من ورا مرسي والإخوان ؟ كنباوي: ايوة شوفت لعنه وحلت على مصر من عصابه ألف تحيه لمبارك اللي كان لاممهم وعارف يتعامل معاهم وموريهم العين الحمرا خسرنا كتير بعد مبارك صحيح كنا خسرانين في وجوده وحكمه بس مش قد الخسارة بتاعة دلوقتي خسارة بعد مبارك كبيرة اوي والشعب النهاردة بيدفع تمنها غالي كنباوية: المشكله أن البرادعي قدم استقالته خايف على منظره قدام العالم وخايف على صورته ليقولوا أنه قبل فض الاعتصامات بالدم غبي ماهو ده كان لازم يحصل هو ماشافش ترسانة الأسلحة اللي الشرطة طلعتها من رابعة والنهضة ماشافش القناصة بتوعهم ماشافش همه بيقتلوا في الناس ازاي ؟ ماشافش العربيات اللي حرقوها ؟ ماشافش السرقة اللي سرقوها ماشافش الاقسام اللي ولعوا فيها ؟ الله يلعنهم في كل كتاب دول لازم يتبادوا دول عاوزين يولعوا البلد رايحين يولعوا في الكنايس بس الاقباط عاقلين وفاهمين لعبتهم القذرة ومش حتخيل عليهم واحنا حنصلح الكنايس دي بعد الازمة دي ماتعدي وحترجع زي الأول واحسن ألف مرة كنباوي: يارب يكون بصحيح حكاية القبض على البلتاجي والعريان وحجازي خلي البلد تنضف بقي كنباوية: لا صحيح وده اللي كان لازم يحصل من زمان ينصر دين اللي قبض عليهم كنباوي: دول همه اس الفساد والبلاوي اللي حصلت في البلد دول المحرضين الفعليين الله يخرب بيوتهم وينتقم منهم يارب كنباوية: كام يوم بلاش كام يوم.. أسبوع والدنيا ترجع لحالها بس لازم الشرطة والجيش ياخدوا بالهم من أي عمليات تخريبية ممكن تحصل من الإخوان على سبيل الانتقام الايام اللي جايه الداخلية لازم تنام وعنيها في وسط رأسها كنباوي: وتنام ليه المفروض ماتنامش خالص الايام اللي جايه تفضل لحد ما الأمور تتلم وتهدى من عند ربنا كنباويه: قناه الجزيرة مولعاها كنباوي: مش جديد عليها ماهي مش عايزة غير الخراب واهه جات لها على الطبطاب كنباوية: ياعم هي جات على قناه الجزيرة على الاقل دي قناه قطريه إسرائيلية تعالي شوف امام الجامع اللي قدامنا جامع السنيه كان بيدعي ويقول ايه النهاردة اصعب حاجه ياكنباوي أن رجل الدين يكون غبي متخلف مش فاهم حاجه بيأذي الناس من غير مايفهم كده دول لازم أمن الدوله ترجع تراقبهم من تاني زي الأول واكتر لأن دول مش حيرجعوا الا بضرب الجزم والضرب على القفا كنباوي: عندك حق لازم نفصل الدين عن السياسه لازم علشان البلد دي تقوم لها قومه من تاني كنباوية: السيسي لازم يطلع يخطب في الشعب كنباوي: لا ياهبلة مش دلوقتي لما الأمور تهدي شويه ده عين العقل دلوقتي خطابه يولعها نار كنباوية: ساعات دماغك بتشتغل كويس اوي وعنيك بتشوف اللي انا مابقدرش اشوفه شاطر ياكنباوي كنباوي: اللي حصل في البلد السنتين اللي فاتوا خلا العيل الصغير بقي يفهم في السياسة ياكنباوية انا بقي مش حفهم ؟ كنباوية: تفهم ونص ياكنباوي ده انت دماغك متنوره بس مشاغل الحياه هي اللي لاهياك عن السياسة كنباوي: كده الحال حيقف شويه معاكي فلوس ولا مفلسه ؟ كنباوية: مستورة ياكنباوي خيرك فايض وزايد ومكفي لو انت محتاج حاجة قول ؟ كنباوي: لا مستورة برضك قوليلي مانفسكيش في حاجة انزل اجيبهالك قبل حظر التجول.. مابتتوحميش على حاجة ؟ كنباوية:نفسي في الاستاكوزا ياكنباوي كنباوي: انا بقول اخش انام بدري أحسن تصبحي على خير ياكنباوية كنباوية: وانت من أهله ياكنباوي !!
