كنباوي وكنباوية.. حلقة رقم (113).. ساعة الصفر العدوية النهضوية

كنباوية ليست على ما يرام هذه الأيام حالتها النفسية غير مستقرة رغم فرحتها بحملها الذي تراقص له قلب كنباوي بين ضلوعه ورقصت هي فرحا به فهو بالنسبة لها ولجاراتها خير دليل على أن أنوثتها ما زالت وافرة وأن كنباوي ما زال بخير وبصحة موفورة إلا أن الأحداث التي تمر بها مصر منذ عزل مرسي تؤرقها خاصة اعتصامي رابعة العدوية والنهضة وكنباوي يلحظ هذا جيدا ويعاني منه ومن خوفه على طفله الذي في أحشائها مما دعاه إلى الذهاب إليها ومحاولة التخفيف عنها والوقوف على أسباب قلقها.
كنباوي: يا مالكة القلب من جوه إيه بيكي؟
كنباوية: اللي بيا لا ينحكي ولا يتقال.
كنباوي: للدرجة ديه؟
كنباوية: وأكتر شويه.. أنا تعبانة أوي مش بحب فرض الرأي والإجبار ولوي الدراع.
كنباوي: مين ده اللي يستجري يجبرك على حاجه أو يلوي دراعك وأنا عايش لا عاش ولا كان.
كنباوية: اللي بيحاول يلوي مش بيلوي دراعي أنا بيحاول يلوي دراع حامينا وناصرنا.
كنباوي: يبقى بتتكلمي عن السيسي؟
كنباوية: طبعا هو فيه ناصر لينا غيره دلوقتي؟ الإخوان بيحاولوا بشتى الطرق إنهم يلووا دراعه علشان يعفي عنهم ويخرج لهم باقي العصابة من السجون وهو حيران مش عارف يعمل إيه هو بين نارين يا إما يفض الاعتصام بالقوة ويتحمل نتايج القوة واستعمالها في نظر المجتمع الدولي وجمعيات حقوق الإنسان وعقوبات مجلس الأمن على مصر حال استخدامه القوة خصوصا مع وجود شرائط فيديو لفض الاعتصام بالقوة وده اللي حيحرص عليه البلتاجي في حاله فض الاعتصام بالقوة علشان يوزع الشرائط على وكالات الأنباء العالمية والقنوات المشبوهة زي قناة الجزيرة ويحقق غرضه الدنيء.
كنباوي: هو إيه بالظبط اللي حيحصل نتيجة فض الاعتصام بالقوة من قبل مجلس الأمن؟
كنباوية: إسقاط النظام الحالي أو أضعف الإيمان منع وقطع العلاقات معه من قبل الغرب واعتبار النظام الحالي نظاما فاشيا مناهضا لحقوق الإنسان طالما اتسم بالدموية ويمكن يوصل الحال لاستخدام نفس الأسلوب اللي استخدمته أمريكا قبل كده مع نظام البوسنة والهرسك أو نظام صدام حسين.
كنباوي: علشان كده السيسي حيران؟
كنباوية: أيوه يا حبة عيني وغير كده لا قادر يستحمل عنادهم وقعدتهم كده في رابعة العدوية والنهضة وسكانهم في حالة نفسية سيئة ومغصوبين على أمرهم وهو مش عارف يعمل إيه ده حتى الحوار مرفوض لطلباتهم اللي حسست السيسي إنهم بيحاولوا يستغلوا الموقف ويلووا دراعه ويخلوه يعمل اللي همه عايزينه لدرجه إن الراجل مبقاش يعرف ينام ولا دعواتهم عليه إن شاء الله همه الأندال دول.
كنباوي: طيب فكرك السيسي حيتصرف في المشكله دي إزاي؟
كنباوية: بص يا كنباوي فيه أخبار اتسربت إن فض الاعتصام حيتم النهارده الفجر ولو ده حقيقي يبقى الخيرة فيما اختاره الله دول مش حييجوا أبدا بالذوق طول ما راس الحية البلتاجي ما هو قاعد بينهم هو والعقرب صفوت حجازي همه اللي بيسخنوا المعتصمين اللي نصهم شحاتين وباعة جائلين ومتسولين وناس غلابة عاطلة عن العمل وما صدقت تلاقي مأوى يلمهم وفطار وغدا وعشا ومصروف جيب ده كمان لامم عيال الملاجئ وأطفال الشوارع وعمل لهم (بيسين ) حمام سباحة علشان العيال دي ما تزهقش وتقول يا فكيك وعمل لهم ترابيزات بينج بونج وبلياردو كمان علشان يلعبوا كبار وصغار وينبسطوا يروحوا ليه بقى أكل ومرعى وقلة صنعة حد يلاقي دلع وما يدلعش؟ ده حتى يبقى عيب وحرام.
كنباوي: قولتيلي.. أتاري القعدة بتاعتهم طولت ما هما كده بياكلوا في أتة محلولة وعايمين على وش الفتة.
كنباوية: ماهمه فعلا هناك بياكلوا فراخ ولحمة وفتة والحلو أم علي وصوابع زينب وبسبوسة بالقشطة وكنافة بالمكسرات فلوس مغسولة وملهاش صاحب بتتصرف عليهم والتعبان اللي اسمه بديع مستخبي وبيسوقهم من بره.
كنباوي: بس أنا سمعت إن فيه صفقه بتيم بين الجيش والكتاتني وأبو العلا ماضي على خروجهم مقابل فض الاعتصام بالذوق.
كنباوية: كل شائعة فيها شيء من الصح وشيء من الغلط بس لا مش السيسي اللي يعمل كده ولا يرضاه ده راجل من ضهر راجل أنا سامعه أن النور والميه حيتقطعوا عن اعتصام رابعة والنهضة وحيتمنع عنهم الأكل لحد ما يقولوا حقي برقبتي.
كنباوي: لا الكلام ده لا حيودي ولا حيجيب ضربه بالمرزبة ولا ميه بالشاكوش لازم ياخدوا فوق دماغهم واضرب المربوط يخاف السايب.
كنباوية: بيقولوا ساعة الصفر النهارده الفجر فكرك حقيقي؟
كنباوي: يا خبر النهاردة بفلوس بكره يبقى ببلاش وبكره نقعد جمب الحيطة ونسمع الزيطة وربنا فرجه قريب.
كنباوية: على رأيك كلها سواد الليل والحقيقة تبان وربنا يعديها على خير.
كنباوي: آمين يا رب آمين!