كنباوي وكنباوية.. حلقة رقم (107).. مرسي وبيريز حبايب !

كنباوي يداعب كنباوية بعد الإفطار ويتودد إليها فرحا منذ أن علم بخبر حملها الذي أدخل على نفسه السرور والبهجة والسعادة..
كنباوي: إيه ياقمر يابدر البدور بلغتي العيال بخبر حملك وانك حتجيبيلهم ننه صغيره حتبقي اخ أو اخت ليهم ؟
كنباوية: لأ لسه مابلغتهمش مكسوفة منهم
كنباوي: مكسوفة من ايه ؟ ده اسمه كلام ده ؟ في ايه يكسف ؟ كل الستات بتحمل وتولد دي سنة الحياة
كنباوية: بس مش في السن ده
كنباوي: سن ايه انتي لسه شباب وانا لسه بصحتي وده حلال ربنا خلاص انا حبقي اقول لهم واشيل عنك الحرج
كنباوية: خلاص اعمل اللي انت عايزه وشايفه صح
كنباوي: ايوه انا حتصرف قوليلي بقي ايه عندك من أخبار جديدة ؟
كنباوية: شيمن بيريز زعلان على مرسي وزوال حكم الإخوان
كنباوي: سبحان الله وده من ايه ؟ وايش لم الشامي على المغربي ؟
كنباوية: المصالح بتتصالح ياكنباوي
كنباوي: وايه مصلحة إسرائيل في حكم الإخوان ومحمد مرسي ؟
كنباوية: انا اقول لك ياسيدي
كنباوي: قولي ياست الكل
كنباوية: لما الإخوان طلبوا من أمريكا انها تقف جنبهم في الانتخابات الرئاسيه اللي فاتت وتساعدهم وتساندهم وتدعمهم كمان بالفلوس اللازمة للدعايه الانتخابية أمريكا وافقت بس بشروط
كنباوي: شروط ! ايه هي بقي الشروط دي ؟
كنباوية: أهم الشروط دي كان عدم التفكير مجرد التفكير بالمساس بمعاهدة كامب ديفيد وأمن إسرائيل
كنباوي: والإخوان طبعا وافقوا على كده
كنباوية: ووافقوا كمان على اللي أخطر من كده
كنباوي: وايه هو اللي اخطر من كده ؟
كنباوية: الأخطر من كده أن حماس ماتضربش صاروخ واحد على إسرائيل
كنباوي: وايه دخل مرسي والإخوان بحماس وايه اللي ممكن تعمله في موضوع زي ده ؟
كنباوية: انا اقولك وافهمك ياكنباوي حماس فرع من فروع الإخوان المسلمين والدليل على كده أن الإخوان أمروا حماس أنها تبطل تضرب صواريخ على إسرائيل ومفيش صاروخ واحد انضرب على إسرائيل من حماس من يوم ما الإخوان مسكوا الحكم همه ومحمد مرسي
كنباوي: للدرجه دي الإخوان لهم تأثير على حماس ؟
كنباوية: واكتر كمان من كده انت ايه مش واخد بالك من اللي بيحصل في سينا ما اللي بيحصل في سينا ده بمباركة الإخوان وتنفيذ حماس والجهاديين ياكنباوي انت ناسي أن البلتاجي قال يوم عودة مرسي في نفس اللحظه مفيش طلقة رصاص حتنضرب في سينا
كنباوي: ياولاد الكلب يعني الإخوان همه اللي عاملين كده ؟ وبيموتوا ظباطنا وجنودنا في سينا ؟
كنباوية: أيوه ياكنباوي همه السبب عايزين يحكموا مصر بلوي الدراع وبالضغط شوفت صفاقة أكبر من كده ؟
كنباوي: رغم أني مش عارف صفاقه يعني ايه إلا أني ماشوفتش
كنباوية: مين بقي يضمن لأسرائيل أن اللي حيجي يحكم غير الإخوان حيصد عنهم صواريخ حماس وإسرائيل مالهاش غير مصلحتها علشان كده هي عايزة مرسي والإخوان
كنباوي: انا كده فهمت الله ينور عليكي
كنباوية: ياكنباوي دول سامحين لمراسلين أجانب من إسرائيل بالإقامة معاهم في رابعة علشان ينقلوا اللي بيحصل هناك لإسرائيل
كنباوي: ماكفاهمش قناة الجزيره واللي بتعمله رايحين يتحالفوا مع إسرائيل ؟
كنباوية: دول عندهم استعداد أنهم يتحالفوا مع الشيطان علشان مصلحتهم
كنباوي: الله يلعنهم فين الوطنية ؟
كنباوية: مانجيلكش في وطنية دول مايعرفوش حاجة اسمها وطنية دول يعرفوا مصلحة الجماعة وبس
كنباوي: الله يحرقهم همه وجماعتهم بجاز وسخ
كنباوية: يسمع منك ربنا آمين يارب
كنباوي: اللهم آمين يارب العالمين !