عمرو أديب للمواطنين: أجلوا الإنجاب للسنة الجاية

قال الإعلامي عمرو أديب: "هنسأل السؤال الصعب والأهم واللي هو بيأثر علينا كلنا،
الدولة المصرية ماذا ستفعل هل تستطيع أن تصرف علطول والقروض هتكفى علطول، حد فكر مثلا الدولة وضعها ايه وكيف تستطيع أن تتصرف وكلنا في مركب واحدة ولازم نفكر في الوضع، ولم يتحدث أحد حتى الآن عن الدولة وكيف تتصرف مع الظروف الحالية".
أزمة الزيادة السكانية
وأضاف خلال برنامج "الحكاية" المذاع على قناة "ام بي سي مصر": "حد سأل الدولة تقدر تكمل كده قد ايه؟ احنا مجتمع موارده مش مفتوحة أوي؟ وزيادة سكانية 2.5 مليون في السنة بتلتهم كل النمو، وفجأة جالنا مصيبة أو مصيبتين من الخارج، طيب هي الدولة دي عندها الإمكانيات اللى تخليها تتصرف ازاي؟".
الأزمة الاقتصادية العالمية
وتابع: "هناك أزمة اقتصادية حقيقية لازم كلنا نكون حاسين بيها والدولة زيك يا مواطن بتحاول تحافظ علي الغطاء الاجتماعي المعمول لفئات مهمشة وتاخد بالها من الفقراء والعيش يبقى بنفس السعر ولكن ل متى وإلى أين؟ ماذا سنفعل؟ الدولة مش ساكتة ولكن الحرب لو استمرت سنة كمان ماذا سنفعل؟ الإدارة المصرية الحالية تشعر بالظلم الفظيع في ظل الأزمة العالمية والوضع المأزوم عالميا، فاَن الأوان أننا نتكلم عن الوضع الحالي".
تأثيرات الأزمة العالمية
وأكمل: "دائما ما كنا نتحدث عن الزيادة السكانية، الاَن تستطيع أن تفهم ان تأثيرات الأزمة علينا بسبب الزيادة السكانية 3 أضعاف، أي نمو بنعمل بيتاكل، وكنا هنوصل قبل الكورونا ل8% ومحصلش دلوقتي بيتوقعوا لنا 5% في 2023 وده صعب برضو، في الأزمة الراجل اللى عنده عيلين زي اللى عنده 4 لأ طبعا، اللى عنده عيلين قادر شوية ولكن ماذا يفعل اللي عنده 5 و7 عيال؟ لازم في المواقف دي يبقى فيه كلام يواجه الحقيق، العقل الجمعي المصري مشغول بالتفاصيل ولكنه لا يرى الصورة العامة بشكل واضح".
تأجيل الإنجاب للعام المقبل
واستطرد: "قلت ولسه بقولة للناس ده مش عام الإنجاب في ظل الظروف الاقتصادية الحالية والأزمة العالمية، أجلوا الإنجاب للسنة الجاية أو اللى بعدها احنا في حرب، اَن الأوان أن ننظر لتلك المسألة بشكل واضح".
أزمة كثافة الفصول
ولفت: "لسه بنتكلم عن فصل مدرسي فيه 40 و50 و70 طالب، وده تحدى في الظروف الطبيعية العادية طيب ودلوقتي نعمل ايه، يا جماعة احنا في أزمة اقتصادية مش احنا اللى مستوردينها دي متصدرة لينا".
أعباء الدولة
وأشار: "الدولة مطالبة كل يوم الصبح بربع مليون رغيف وتستوعب أكثر من 18 مليون طالب في التعليم الأساسي و3 مليون طالب في التعليم العالي، وكهرباء شغالة ليل ونهار في ظل جو شديد الحرارة، وحدود متأمنة، وكل ده بيتعمل بفلوس، كيف تستطيع الدولة باستمرار تلبية الاحتياجات والمتطلبات في ظل الأزمة الحالية، الدول من حولنا تعاني معاناة شديدة ونحن لم نرى معاناة بعد، الدولة لم تقم بأي طارئ حتى الآن ولكن تحاول مواجهة الأزمة دون الضغط على المواطن".
دعم عربي لمصر
وتابع: "الحمد لله احنا عندنا سند وكتف في المنطقة العربية، وواقفين معانا في ظل الأزمة الحالية بضخم استثمارات، واتفاقية مصرية اماراتية أردنية لضخ استثمارات، اتفاقية سعودية وقطرية لضخ استثمارات".
كل ما تريد معرفته عن تحذيرات السيسي من الزيادة السكانية.. أقوى التحديات
عمرو أديب بعد إقالة إيهاب جلال: بتحرقوا دمنا ليه.. هي البلد دي ملهاش صاحب | فيديو
وأضاف: "هذا ليس وقت أن نحمل بعض الأخطاء ويكون فيه شماعات ولكن وقت نقف مع بعض نعدي الأزمة لإنها خانقة، والروس عايزين ياخدوا العالم كله رهينة ويوقفوا كل سلاسل الإمداد".