الحلقة الاخيرة !

في كل المسلسلات اللي ابتدت دي واللي أولها وأهمها مسلسل الفاتنة الذي تحكي فيه حكاية "أهم وأجمل وأحلى ديكوووور" في المسلسلات المصرية ومسلسل البنت اللي إحنا مش عارفين آخرتها عمالة تحب كل يوم واحد ويسيبها ويطلع بيطنشها مع إنها زي القمر.. هما الرجالة من زمان أوي كده ما عندهمش نظر ولا إيه؟
وكله كوم ومسلسل اللي من غير اسم ده كوم تاني كل شوية طالعله أعداء من حتة وحتى مرشح الرئاسة الأهم في المسلسل مش عارفين نشوفه مشهدين على بعض.. غير بقي المسلسل رقم 137 في قائمة المسلسلات اللي أنا فاكراها اللي فيه الواد البلطجي اللي بيركن عربيات.. وبدل ما يسموه سايس عادي يعني "سايس زي أي حاجة" شربوا أي اسم تاني وخلاص. نهايته يعني، في كل المسلسلات دي ما حدش شاف مسلسل زي مسلسل " رابعة " طبعا مش اللي فيه الست نبيلة عبيد معبودة الجماهير ولا حتي قدرت تخطفه منها سيدة الشاشة المصرية المرأة التي هزت عرش مصر ولا أي حد تاني مسلسل رابعة واللي مليان أحداث أكشن كله على بعضه.. ضرب ضرب ضرب وما فيش أي نوع من أنواع الشتيمة وآخرة المتمة كمان ناويين يوم 10 رمضان يرجعوا المعزول.
طب كانوا بتوع المخلوع قدروا يرجعوه في 3 سنين.. يعني انتوا جامدين أوي كدة وهترجعوه في 3 أسابيع؟!
ده حتي هو مشي بمزاجه قبل ما يخسر الربع الأخير في مخه.. لكن صاحبكم ده أكيد دلوقتي قعد في السراية الصفرا بيعد النجوم وهيفضل يعدهم لحد لما يوصل لمجموعة نجوم " الثريا " ويعد يقول يا ثريا يا ثريا اين انت يا ثريا ويحلم تاني بتليفون يتكلم فيه وهو خارج من السجن
صحيح.. دنيا وادينا عايشنها مسلسلات وكلنا في انتظار الحلقة الأخيرة... بس مش في 10 رمضان.. لسة بدري!.