أبوراسين.. حلقة رقم (2).. إنقاذ جبهة الإنقاذ

أبوراسين: عارف يا أبوراس أنا صعبان عليا أوى جبهة الإنقاذ الوطنى دى مش عارفين يفكروا ومش عارفين يلاقوا مع الإخوان ومرسى أى حل أصل بينى وبينك خيرت الشاطر ده عقر وبديع كمان ما يعلم بيه غير ربنا وكله كوم والعريان ده كوم تانى ولا أبوالكتاكيت سهن وساهى ويطلع منه ديك يقول كيك ده جحر تعابين واتفتح ولا حد عارف يقفله
أبوراس: طيب وانت رأيك إيه يا أبوراسين فكرك تعمل إيه الجبهة مع التعابين دى؟
أبوراسين: التعابين دى لازمها حاوى علشان يصرفها وعمك البرادعى مالهوش فى لعب وتصاريف الحواة ده وخالك حمدين مايملكش غير صوته ورؤيته ومحبيه ده غير أنه مشغول كمان اليومين دول بفيلمه مع غاده عبدالرازق المزة الجامدة حيعمل إيه يعنى حيقطع نفسه وموسى مستنى يشوف أخرة ده كله إيه وبعدين يدخل كارت حشر فى أى مصلحة والبدوى كل اللى شاغله لم الفلوس وشركة الأدوية بتاعته والحزب ومشاكله والباقى بيصقف للهيصة واللمة
أبوراس :طيب الحل إيه؟ قول تعبتنى
أبوراسين: الحل هو التنظيم لأن الإخوان فردوا قلوعهم بالتنظيم لازم الجبهة تنظم نفسها وتتحد مع البلاك بلوك ويخاطبوا أمريكا عن طريق البرادعى ويخاطبوا كمان إسرائيل ويطمنوها على العلاقات معاها وكمان الدول العربية اللى رافضة حكم الإخوان ومرسى ما هو إيد لوحدها ماتلطمش ولاتصقفش
أبو راسين: وفكرك ده سهل يا أبوراس؟
أبوراسين: طبعا مش سهل بس المحاولة مش حتضر ده غير كمان العصيان المدنى اللى حيهيج الشعب كله على الإخوان بس لو يتعمل صح ويشارك فيه كل الشعب مش شوية أه وشويه لأ، كل ده كفيل بإسقاط مرسى وإجهاضه وإجهاض حكومته ونزيف الإخوان
أبوراس: طيب ماتروح تعرض عليهم الأمر
أبوراسين: فكرك كده يا أبورأس؟
أبوراس: أيوة ده عين العقل دول ناس متنورة وبتقدر وبتفهم مش أقفال زى الإخوان روح احضر اجتماعاتهم وراهن مرة واحدة على الحصان الكسبان مش الخسران
أبوراسين: والله لأعمل كده وحروح أحضر اجتماعاتهم وأنورهم وكله بثوابه !