يوميات صايم حلقة رقم (3)

_صايم: والله الواحد محتار يفطر فين ولا فين خايف اروح رابعة يزعلوا بتوع التحرير وخايف اروح التحرير يزعلوا بتوع رابعة اعمل إيه؟
_الزوجة بعد أن تظهر عليها علامات التعجب: والله يا خويا مش عارفة اقولك ايه بس عشان تريح دماغك روح التحرير الأول واسمع منهم كويس عشان تعرف ترد على بتوع رابعة.
_صايم بعصبية: والله اللي يكلمني قبل الفطار ما يخسر إلا نفسه انا بقول من دلوقتي يعني حد يقول لي اسمع يا صايم افهم يا صايم ما يسمع غير الكلام الوحش قوي.
_الزوجة ضاحكة: طيب انت رايح ليه يا صايم عشان تفطر ولا عشان تحل المشكلة
_صايم بزعل: والله انتي غبية.. لا مش انتي اللي غبية انا اللي غبي اللى بتكلم معاكي روحي من وشي دلوقتي.
_الزوجة: خلاص خلاص والنبي ما تزعل نفسك أبدا انت تروح المكان المناسب الأول وانت لو مش مهم في البلد كان حد دور عليك ؟
_صايم مبسوط جدا: شوفتي الكلام اللي زي العسل أيوه كده خلي الواحد يحس أنه متجوز بجد الله يسعد أيامك قولي كلام حلو كمان لكن تفتكري الجماعة بتوع التحرير هيسمعوا كلام عمهم صايم ولا......
-الزوجة: وانت فيه حد يقدر يقولك على حاجة لا يا صايم بس يا خويا احكم بالعدل آه ولو اني إحساسي بيقولي إن التحرير على حق مش عارفة ليه؟
-صايم: والله هتخليني أغير رأي فيك وأقول عليكي بتفهمي وانا كل ما حد يتكلم عن بتوع التحرير قلبي بيرتاح سبحان الله بس برضه للأمانة نسمع بتوع رابعة يمكن يسمعوا لصوت العقل مرة ؟
-الزوجة: ربنا يعينك يا صايم هتروح امتي التحرير النهاردة
_صايم عصبي جدا: ايه انتي ما صدقتي عايزة تخلصي مني بأي شكل إيه حرام احنا في رمضان احلف ما اروح لا التحرير ولا رابعة
_الزوجة: والله ما قصدي انا كل اللي اقصده انك تروح عشان ما حدش يزعل منك
_صايم: تصدقي وتؤمني بالله اني غلطان وما حد رباني انى بتكلم معاكي قومي شوف هتفطرينا ايه قومي الله يسامحك !