عمرو أديب: محدش يهاجم منتخب مصر الا بعد مارس

قال الإعلامي عمرو أديب:"فيه انتعاش غير طبيعي والناس كلها فرحانة لمنتخب مصر بعد الفوز علي كوت ديفوار والتأهل لدور الثمانية".

دعم منتخب مصر
وأضاف خلال برنامج "الحكاية" المذاع علي قناة "ام بي سي مصر":"قلت لكم اقفوا جنبهم وبعدين هاجموهم، ودلوقتي بقول ان هذا المنتخب العظيم الذي ادى مباراة تاريخية في ظل ظروف صعبة جدا اللاعيبة كلهم كانوا ابطال، بقول النهاردة ان هذا المنتخب يستحق المساندة للنهاية حتي بعد تصفيات كأس العالم وليس بطولة الامم الأفريقية".

الوصول لكأس العالم
وتابع:"الامم الأفريقية جميلة وعلي عيني وعلي راسي ولكن الأهم أن نصل الي الدوحة ونفوز بمباراتي السنغال".
واكمل:"فلنقف خلف المنتخب بقوة وارحموا اللاعيبة ومش وقته ابدا تقرروا انكم عايزين تجيبوا مدرب وكل واحد عنده واحد صاحبه عايزه مدرب يطلع عين المنتخب وجهازه الفني، محدش يقرب من المنتخب حتي نهاية مارس الجاي".
الونش وحمدي فتحي يشاركان في تدريب منتخب مصر|صور
أخبار سارة عن منتخب مصر قبل مواجهة المغرب بأمم أفريقيا
الثقة في منتخب مصر
وأوضح:"لازم يبقى عندنا منهج في الأشياء ومش نهاجم وخلاص، الناس عملت اداء لا يصدقه عقل ويستحقوا التأييد والمساندة، ويوم الأحد مع المغرب يحدث ما يحدث ولكننا عندنا ثقة كبيرة في لاعيبتنا واللى يقولك اللاعيبة مش بتسمع دبة النملة اللى بتحصل في مصر يبقى واهم، وعندنا لاعب عالمي اسمه محمد صلاح وعمره ما خيب امالنا في ضربة الجزاء الأخيرة، وهيلعب في مارس الجاي قدام ساديو ماني وهتشوفوا هيعمل ايه".
وأكمل:"يوم مباراة كوت ديفوار قلت لو اتغلبوا لعبوا كويس، ومستغرب إنى واصل لمرحلة بقول لبلد اقفوا جنب منتخبكم وفيه فرق تانية بيقولوا انصر فريقك غالبا أو مغلوبا، شوفوا التشجيع لتونس عامل ازاي والجزائر والكاميرون عامل ازاي".

وتابع:"دبة النملة بتفرق مع لاعيبة منتخب مصر دول شبابى ومحتاجين الدعم مننا، قدروا الضغط النفسي اللى علي اللاعيبة وعلي صلاح في اخر ضربة جزاء، وصلاح بيقولكم ارفعوا ايديكم عن منتخب مصر، مش ضد انك تهاجم ولكن ضد التريقة والتحفيل والتسفيه وكسر المقاديف انتوا كده بتلعبوا مع مين؟ عايزين نلعب مع منتخب مصر".

واستطرد:"محدش له دعوة بمنتخب مصر الا بعد مارس، ومحدش ينتقد ولا يهاجم، وفي الأساس مصر مش من الدول المرشحة للفوز بالأمم الأفريقية وكل الدول المرشحة خرجت، العالم العربي واقف وراكم ومتعاطف مع منتخب مصر ويعز عليا ان شبابنا وجمهورنا ميكونوش واقفين مع منتخب بلادهم".

ضرب محمد صلاح
ولفت:"صلاح اتضرب كمية ضرب قدام كوت ديفوار غير طبيعية، ومنهم لاعب كمل في وشه، واحنا قدام مدرسة مختلفة يوم الاحد ولعب المغرب قريب من شغلنا اللى قايم علي الموهبة والفنيات والماتش محتاج التسديد اللى احنا عندنا مشكلة فيه".

وأشار:"محمد صلاح قاللى احنا عندنا في ليفربول مدرب للكرات الثباتة، واحنا للأسف في المنتخب عندنا مشكلة في التسديد ولكن يوم الأحد عندنا لاعيبة تقدر تحقق الفوز وتكسب".

روح منتخب مصر
وتابع:"شوفتوا الروح مابين اللاعيبة عاملة ازاي والصداقة والحب والأخوة بين أبو جبل والشناوي وكل اللاعبين، ده كل بيبان كورة وبيتقري في الملعب".

موعد مباراة مصر والمغرب
وتقام مباراة منتخب مصر أمام نظيره المغربي في الخامسة مساء الأحد المقبل بتوقيت القاهرة، الرابعة بتوقيت الكاميرون.
تقديم موعد المباراة
وقرر الاتحاد الأفريقي لكرة القدم "كاف" تعديل موعد مباراة دور ربع النهائي لبطولة كأس أمم أفريقيا بين منتخب مصر والمغرب، بعد نقلها من ملعب "أوليمبي" الذي شهد أحداث دموية ووقوع ضحايا عقب إنتهاء مباراة الكاميرون وجزر القمر بدور الستة عشر، لتقام على ملعب أحمدو أهيدجو بالعاصمة الكاميرونية، وجاء القرار تقديرا لمشاعر أهالي الضحايا والمصابين الذي وقعوا في أحداث ملعب أوليمبي.
وتم تقديم المباراة لتنطلق في الخامسة مساء يوم الأحد المقبل بدلًا من السادسة مساءً على ملعب أحمدو أهيدجو، خاصة أن الملعب نفسه سيستضيف مباراة السنغال وغينيا الإستوائية عقب مباراة مصر والتي ستنطلق فى التاسعة مساء.