ساقعة يا دنيا ساقعة!!

- افتح يا حسين عايزة أغير هدومى.
- مش فاتح يا زينب غيرى فى الأوضة التانية.
- طيب هاتلى الهدوم بتاعتى.
- ما تحاوليش تضحكى عليا يا زينب، برضه مش هاطلع من تحت اللحاف.
- يا راجل وبعدين معاك؟ الجيران هتصحى!!!
- ما حدش نايم أصلا من الساقعة دى يا زينب، يعنى زعقى براحتك..!!
- يا حسين هاكسر الباب ..!!
- اكسريه، وأبقى أصلحه فى الصيف يا زينب، بس برضه اللحاف لأ..!!!
- طيب خد ريموت التليفزيون يا حسين.
- قديمة يا حياتى، الريموت أهو معايا.
- طيب أعملك شاى عشان تتدفى يا حبيبى.
- يا ريت يا زينب.
- طيب افتح الباب وهات الكبريت يا حسين.
- الولاعة فى المطبخ يا زينب، وبعدين البوتاجاز إشعال ذاتى، ما تحاوليش، والعبى غيرها!!
- الحقنى يا حسين فى برص فى المطبخ.
- ما تخافيش يا زينب هتلاقيه متجمد من الساقعة ولو مش مصدقانى اسأليه يا زينب وهو يقولك!!
- انت هتشتغلنى يا حسين؟!! إزاى يعنى هيرد عليا؟!!!
- إحنا فى عصر النهضة يا زينب، كلها شهرين وتلاقى الفيران بتساعدك فى شغل المطبخ!!
- والنبى انت فايق ورايق يا حسين، ما تفتح الباب بقى أنا تلجت فعلا، ورجليا مش حاسة بيهم.
- طب والشاى يا زينب؟
- لما المية تغلى البرص هينادى علينا يا سونة، ثوانى هرد على التليفون يا روحى، ألو إزيك يا ماما، عاملة إيه يا حبيبتى واحشانى خالص، وبابا عامل إيه، بوسيهولى كتير يا ماما، بتقولى إيه يا ماما؟! فى بيان هيتذاع دلوقتى؟! ماشى ماشى سلام يا ماما دلوقتى، افتح يا حسين بسرعة ماما بتقول فى بيان هيتذاع دلوقتى.
- يا بنت المحظورة قصدى يا بنت المحظوظة، كنت هخليكى تباتى بره النهاردة!! ادخلى بسرعة البيان اشتغل.
"نص البيان":
أين هى الساقعة؟! إن من يشعرون بالساقعة هم السقعانون، مفيش دولة بتسقع، ادخل يا بنى بسعاد حسنى "الدنيا ربيع شكرا يا بديع أكد لى على كل المقاطيع".
- تكبير، تكبير، وأنا اللى كنت فاكر الدنيا ساقعة يا زينب، قومى ارمى اللحاف ده فى أى حتة، والصبح تروحى تبيعيه وتشترى بتمنه مايوهات، وفكرينى أتصل بميدو عشان أجيب منه مفاتيح الشاليه..!!!
- سمعا وطاعة يا سون سونتى..!!!