يوميات رئيس.. حلقة رقم (9).. مرسي يعتقل المرشد والشاطر و"أبو إسماعيل" والبلتاجي

يعيش في قلق وتوتر وخوف من مصير مجهول يعاني اصفرار الوجه والارتباك.. متوتر جدا لدرجة أنه يرفض أن يقال له يا ريس.. وفي ليلة 2-7 قام مفزوعا يصرخ: لا لا حرام أنا الريس يا بني كل حاجة بالتفاهم بلاش العنف الحقني يا بلتاجي يا شاطر يا مرشد يا "أبو إسماعيل".
أم أحمد مفزوعة: مالك يا ريس ألف سلامة عليك؟
الريس: ما تقوليش يا ريس يقطعها ويقطع سنينها مالها الجامعة كانت زي الفل سنتين وكنت هبقى عميد منه لله اللي كان السبب اللي ضحك علىّ.. صح؟
أم أحمد: وطي صوتك الحيطان ليها ودان.
الريس يصرخ: أنا عايز الكل يسمع ضيعوا مستقبلي والله الشهيد حسن البنا لو كان قاعد لكان علمهم الأدب.
أم أحمد باستغراب: مرسي مالك ألف سلامة على عقلك يا راجل إيه هي الحالة رجعت لك تاني ولا إيه؟
الريس بصوت عال: حالة إيه انتم اللي مجانين أنا لو أخدت الشعب في حضني مش كان زمانه واقف معايا دلوقتي؟
أم أحمد: والإخوان وعشرة العمر هتبعها يا مرسي؟
الريس: والله طالعه معايا أروح التحرير وأقول يسقط مرسي.
أم أحمد: انت بس أعصابك بايظة من المظاهرات.
الريس: بايظة من كله أنا موظف يا ست أم أحمد انتي فاكرة إني ريس بجد.. لا اصحي _ويطلع لسانه_ والناس عارفه كده.
أم أحمد: لا حول ولا قوة إلا بالله أكتر من كده ويزيح ربنا.
الريس: عشان تعرفي إن مخي سليم المتظاهرين بيقولوا يسقط حكم المرشد.. صح ولا لأ؟
أم أحمد: عشان انت والشاطر والمرشد يد واحدة.
الريس يرقص: خلاص جاتني حتة فكرة إنما إيه فكرة شياطين والعياذ بالله؟
أم أحمد: طالما من الشيطان تبقي مرفوضة ومع ذلك اسمعها.
الريس: اطلع دلوقتي في التليفزيون اعتقل المرشد والشاطر و"أبو إسماعيل" والبلتاجي وكل القيادات الإسلامية المرفوضة في الشارع _يرقص_ وكده الناس كلها تقول مرسي مرسي أهو أهو _وهات يا رقص_ والشعب يبقى حبيبي وأنا حبيب الشعب.
أم أحمد في حالة ذهول: مستحيل ده إنت تتنحى أحسن.
الريس: والله لو مش خايف على زعل العيال أعتقلك إنتي كمان _وأخذ يغني_ يا مرسي يا حبيب الشعب والشعب كمان بيحبك والثوار وتمرد حبابيك_ أنا بقى هعرف أثبت الناس دي إزاي!!