بكيااااااااااااااااااااااااااا

ياما فى الجراب يا بكيا.. حد شارى.. حد بايع.. سبع صنايع.. والبخت ضايع.. أبيع أبيع كل البضايع.. حتى المناصب.. حتى الرفايع.. وكل اللى عندى اسمه «بكيا»، وياما فى الجراب يا بكيا.. لو تبيعلى أو «تبتاعلى» كله بكيا.. يلا بكيا.. يلا بكيا..
يعنى مثلا عندى "تأييد للبيع".. فقد أعلنت جماعة "كيلو التأييد بكام" عن توفر عدد من أشكال التاييد الأعمى.. صالحة لتأييد ديكتاتور أو طاغية.. بمقابل مادى أو معنوى.. والدفع مقدما.. نقبل العملات الأجنبية.. ها.. حد قال أنا هنا.. حد شارى؟..
طب عندى حاجة للأطباء فقط.. فوزارة الداخلية تعلن عن توفر فرصة لتدريب الأطباء المصريين على الحروق والخرطوش – لدينا عدة ميادين وشباب مستهدفون فى القاهرة والإسكندرية ومعظم ميادين الجمهورية – نحيطكم علما بأن الضرب على مدار الساعة.. حد ناوى يتقدم.. حد عايز بكيا..
وكمان عندى فى الجراب "مفقودات".. فهيئة "البحث عن الشرف " تعلن أنها عثرت على ضمير ميت يشتبه فى موته لمستشار رئيس لا يزال فى خدمة السلطان – الضمير مستدير يعمل بطاقة كاملة صالح للاستخدام فى فترات الانتقال الثورى.. حد هيقول أنا.. حد هيقول بتاعى؟.. وعندى كمان ومع الباعة "كتاب كيف تصبح ديكتاتورا".. وضعه نخبة من مزورى التاريخ ينتمون جميعا إلى الجماعة.. كتاب لا غنى عنه لأى حاكم فى المحيط العربى - كيف تكمم الأفواه فى ثلاث خطوات.. ها حد شارى؟.. طب عندى كمان حاجات جاهزة للحرق.. عندنا أحزاب وفضائيات ومقرات ومؤسسات جاهزة للحرق فورا بالبنزين والسولار والفحم كمان.. حرق ذاتى وآخر آلى ونوع ثالث يمكن حرقه يدويا.. جميع مواقعنا تحت حراسة الأمن حتى استلامها للحرق..
وأخيرا يا أولاد الحلال عندى "شيوخ لجميع الأغراض" شيوخ للفتاوى الجاهزة والمعلبة.. ذوو أصوات مؤثرة أثناء صلوات الفجر.. يبكون أمام الشاشات دون استعمال الجلسرين.. جاهزون لكل الاحتمالات ومن بينها شهادة الزور.. باختصار شيوخ لكل الأغراض.. مفاجأة.. "اشترى شيخ واحد واحصل على التانى مجانا ".. ها.. حد قال شارى؟ حد قال عايز؟!.. كله عندى فى الجراب.. كله بكيا.. يلا بكيا.. يلا بكيا.. حد عنده بكيا للبيع.. طب حد يشترى؟!.. ميعادنا بكرة وبضاعة جديدة فى الجراب !!