بكيااااااااااااااااااااااااااااااااااااااااااااااا

ياما فى الجراب يا بكيا.. حد شارى.. حد بايع.. سبع صنايع.. والبخت ضايع ..أبيع أبيع كل البضايع.. حتى المناصب.. حتى الرفايع.. وكل اللى عندى اسمه «بكيا»، وياما فى الجراب يا بكيا.. لو تبيعلى أو «تبتاعلى» كلوا بكيا.. يلا بكيا يلا بكيا.. يعنى مثلا عندى ""شيوخ للفتاوى الجاهزه والمعلبه" .. ذو اصوات مؤثره اثناء صلوات الفجر .. يبكون امام الشاشات دون استعمال الجلسرين .. جاهزون لكل الاحتمالات ومن بينها شهادة الزور .. باختصار شيوخ لكل الاغراض .. مفاجأه "اشترى شيخ واحد واحصل على التانى مجانا " .. ها .. حد شارى .. حد عايز ؟! .. وكمان عندى فى الجراب "نائب خاص للايجار" يحبس من تريد .. يعاقب من تشاء .. يحفظ التحقيقات ان اردت ويعيدها الى سيرتها الاولى لو طلبت .. وارد الخارج .. خبره فى الطاعه اكثر من 20 سنه .. ها حد قال أنا شارى .. طب عندى كمان "إعلان عن طلب "كومبارس" فلقد أعلن مقهى بعره اشهر مقاهى الريجيسيرات عن حاجته الملحه لأكبر عدد من الكومبارس شريطة ان يأتى كل كومبارس ببدله كامله للعمل لمدة يوم كامل لدى اللجنه العليا للانتخابات .. الدور المطلوب تمثيله قاضى .. ها حد ناوى يعمل قاضى .. حد فاضى ؟! .. وأخيرا عندى "بطاطين للدستور" .. فلقد أكدت شركة " غطينى ونام " عن توافركميات هائله من بطاطين الكهنه القديمه تصلح كرشوه انتخابيه وتشير الشركه الى انها لم تطرح زيت وسكر هذه الفتره بعد افتضاح امر شركتين من كبريات شركات الجماعه المتخصصه فى الرشاوى .. حد عايز بطاطين .. حد ناوى .. حد شارى .. كله عندى فى الجراب.. كله بكيا.. يلا بكيا.. يلا بكيا.. حد عندوا بكيا للبيع.. طب حد يشترى؟!.. ميعادنا بكرة وبضاعة جديدة فى الجراب !!