بكياااااااااااااااااااااااااااااااااااااا

ياما فى الجراب يابكيا.. حد شارى.. حد بايع.. سبع صنايع.. والبخت ضايع.. أبيع أبيع كل البضايع.. حتى المناصب.. حتى الرفايع.. وكل اللى عندى اسمو «بكيا»، وياما فى الجراب يابكيا.. لو تبيعلى أو «تبتاعلى» كلوا بكيا .. يلا بكيا يلا بكيا .. يعنى مثلًا عندى كبير فى السن، ويبدو فى مظهر الشيخ الجليل.. يجيد الكذب.. صوته جهورى.. مؤثر بحكم تاريخه.. يمكن استخدامه لأكثر من مرة.. نحن نقبل الإيجار ونرفض البدل!!
عندى برضو دارس للقانون.. يمكنكم استخدامه بشكل شخصى.. وهو خبير شرطى سابق.. عمل بعدة دول.. يرفض وصفه ب«العام»، ويفضل أن يكون نائبًا خاصًا لجماعة أو أفراد.. يحظر استخدام سيادته بشكل محايد!!
وللجمهور العادى عندى قرارات يومية مصحوبة ب«ياسر على ينفى».. صادرة عن أعلى رأس فى الدولة -لدينا جملة وقطاعى-، وميزة هذه القرارات أنها غير قابلة للتنفيذ.. تنشر يوميًا فى الجريدة الرسمية مع قرارات إلغائها.. يلا بكيا يلا بكيا.. حد عندو بكيا للبيع.. طب حد يشترى؟! ميعادنا بكرة وبضاعة جديدة فى الجراب!!