قصيدة "من أول السطر" لإحدى مواهب "هريدي نيوز"

أنا قلم رصاص واتبرى.. دا انا قلبي من حزنه اتهرى.. ده انا كنت زي التور في ساقيه.. بيدور لحد ماييجى عليه الدور.. ويندبح !!
أنا إنسان ماتعلمش يقول لأ في وش الحق.. أيوه كنت جبان عارف وباعترف.. بس الوضع خلاص اختلف..
جرب تكسر جناح العصافير.. وتطلب منها تطير.. تبقى بتستعبط أو يمكن متلخبط.. أو مش متظبط..
أنا كنت كل دول.. كنت بلبس مية وش.. كنت شاطر أوى في الغش.. ودايما على لساني كلمة معلش!!
ده اللي اتعلمته ومن صغري فهمته.. وفيكي ده اللي أنا شوفته..
اتعلمت صوتي يكون واطي.. وفي عز الأزمة أطاطي..
اتعلمت أدوس ع الغلبان.. ما انا كنت أشوفه دايما متهان.. محدش قالي إنه زيي.. إنسان !!
فهمت إني أفضل أوسّخ فيكي.. واخَرّب فيكي.. ولما تقسى الدنيا عليا.. ألوم عليكي!!
وشوفت الناس بتبوس الإيد.. تمام زي العبيد..
وشوفت الجهل.. عادي وسهل.. وشوفت الخوف وشوفت الذل.. لناس وناس.. مش ع الكل!!
ده انا كنت مصري الجنسية.. وعديم الإنسانية.. وفاقد للأهلية!!
كل الحاجات شبه بعضها.. مش بكرهها ولا بحبها..
لونها أبيض ولا اسود.. لونها ترابي.. واللون الترابي مش موجود في مكان في العالم غير في بلادي!!
فمن كُتر ماشفت منك خُفت.. فقمت وثُرت.. لقيتني فهمت.. ولما فهمت أنا بلّمت !!
وأديني في ثانية قلبت الدنيا.. وبقيت حاجة تانية..
دا أنا شكلي عقلت.. والعقل للناس اللي زيينا يبقى مشكلة.. وبنستغرب انتي ازاي متحملة..
إزاي ده فيكي جرى.. وليه قبلنا ناكل "خ....."
وازاي شاركنا بسكوتنا في رجوعك لورا..
إزاي صدّقنا أن الغلط هو الصح.. وما فرقناش بين العيب واللي يصح !!
بس لسه مافاتش القطر.. صفحة جديدة ومن أول السطر!!