ما تقولشى علمى واللا أدبى .. قول إنجازات واللا نهضة!

بودى يستذكر دروسه ويردد ما يقرأ ليحفظه جيدا: أول ريس مدنى بدقن، عنده دقن، عنده دقن، ابنه ما نجحشى بمجموع فى الثانوية العامة، ما نجحش بمجموع، ما نجحش بمجموع.
الأب متسائلا باستغراب كبير: إيه يا ابنى هو اللى بدقن، ومين ده اللى ما نجحش بمجموع فى الثانوية العامة؟!..
بودى بنرفزة خفيفة: والنبى يا بابا متعطلنيش ..عندى امتحان فلسفة ومنطق بكره.. ومش عارف أحفظ حاجة من ساعتها .
الأب باندهاش: يا ابنى همّ الفلسفة والمنطق بيتحفظوا اليومين دول ؟، الحاجات دى بتتفهم يا بودي!..
بودى بضحكة ظافرة: ها ها.. دا كان على أيامكم يا والدى، أنا من ساعة ما دخلت أولى ثانوى إنجازات وأنا مهرى حفظ.
الأب مشعلقا حاجبيه من الدهشة: أولى ثانوى إنجازات، أنا مش قايل لك تخش أدبى عشان أنت وحش جدا فى المواد العلمية.. ليه ما سمعتش الكلام؟، أديك مش عارف تذاكر وها تسقط آخر السنة.
بودى ساخرا: مش معقول كده يا والدى.. أنت راجل قديم.. قديم.. يعنى، ما أنا سمعت كلامك ودخلت أدبى فعلا بس القسم الأدبى بقى اسمه إنجازات، والعلمى أطلقوا عليه نهضة، فأنا سبت النهضة وخدت إنجازات، ويا ريتنى فالح فيها.
الأب لا يكاد يصدق نفسه: إنجازات مين يا بنى ونهضة إيه اللى بتاخدوها!، ومين وزير التربية والتعليم الهندى اللى قرر عليكم الكلام الفارغ ده؟!..
بودى بضيق كبير: مش ممكن يا والدى إنت مش عايش معانا فى البلد ولا إيه؟، الإنجازات بتاعت الريس العظيم مجدد نهضة مصر ومأخون القطرين الخديو المبجل الريس مرسى عيسى العياط الأول أدام الله أيامه، والنهضة دى المشروع العلمى العبقرى العظيم اللى بيطبقه فى سرية تامة عشان الغرب ما يطمعشى فيه ويسرقه وينفذه قبلنا، والقسمين دول هم المؤهلين للتعليم الجامعى فى عموم القطر المصرى، والراجل الرائع اللى أقرهما سعادة وزير التربية والتعليم الجديد الدكتور حازم سعيد قدس الله علمه، اللى جه فى آخر تعديل وزارى مكافأة له على تأليفه للكتاب التاريخى العظيم» إنجازات الريس مرسى فى تسعة شهور».
الأب وقد فغر فاه يا نور النبى، طيب وإيه الفرق يا ابنى بين قسم الإنجازات وقسم النهضة يا حبيبى؟، وهل ممكن التحويل بين الأقسام؟، يمكن تخش طب ولا هندسة وأفرح بيك.
بودى بضيق شديد: على فكرة يا والدى إنت كده معطلنى ولو سقطت يبقى إنت السبب، ومع كده هاشرح لك قسم الإنجازات بناخد فيه لغة عربية مطالعة فى إنجازات الريس، ولغة عربية ونصوص شعرية ونثرية فى حلاوة الإنجازات وطعامتها ومنطق وفلسفة الإنجازات، وجغرافيا الإنجازات اللى بتقول مساحة مصر بعد إنجاز إعطاء حلايب وشلاتين للسودان وتسكين الفلسطينيين فى سيناء، وإهداء السلوم ومرسى مطروح للأشقاء الليبيين تبقى قد إيه، وبتشرح خريطة مصر الجديدة وحدودها المستقبلية وهكذا، أما قسم النهضة فبرضه بيتكلم عن الإنجازات بس من وجهة نظر علمية.. أسباب فرقعة البالون فى الأقصر ونوع الغاز المشتعل، سرعة وقوة اصطدام قطار أسيوط ، كوبرى المشاة اللى وقع فى العبور ..حاجات علمية معقدة، وإنت عارف أنا ما ليش فى العلمى، بقول لك إيه.. ماما بتنده عليك..شوفها عايزة إيه وسيبنى أذاكر الله لا يسيئك.
الأب وقد غادر بودى متحدثا إلى زوجته: أنا مش عارف أخلاق العيال بقت صعبة قوى اليومين دول، ها.. طابخلنا إيه النهاردة يا حياتى .. كوسة صح؟..
الأم: كوسة إيه دا كان زمان أيام مبارك، لكن دلوقتى بعد ما قريت كتاب «النهضة المطبخية» لصاحبه الشيف مرسى، عاملة لك أحلى صينية قرع يا حياتى، وبالهنا والشفا على قلبك إنت والعيال يا حبيبى.