فيلم "شىء من الجهل" !!

"جواز مرسى من مصر باطل".... فيلم.."شىء من الجهل"...

بطولة: محمد مرسى، حازم أبو إسماعيل، خيرت الشاطر، هشام قنديل، البرادعى...

الريس مرسى: مرسى ماحدش يستجرى يشهد عليه واصل!..

حازم أبو إسماعيل: ماخلتناش ليه ياريس خلصنا على متظاهرى الاتحادية، همه اللى عاش منهم جعيص ولا جعيص؟، كانوا بقوا زكيبة أموات فى ليلة واحدة، وكانت طلعت جنازتهم جماعة زى جنازة شهداء بورسعيد، ده كان أكبر من فيهم سجد!...

خيرت الشاطر: السجود مش كفاية، ده كان لازم ينداسوا بالجزم، وتتغرس روسهم فى الطين..
الريس مرسى: الأكاده أنا لامم حواليا كل تور وتور يدور وابور طحين.. أبو السماعيل يانور يا اللى سبت الإخوان والسلفية فى الإسكندرية، وقلت الشاحن ضاع وأنت كنت سايب رجالتنا وبتدور على مزاجك، ورايح تتجوز السنيورة الصغيرة علشان ترجع لك شبابك!!....
"لما متظاهرو الاتحادية يموتوا كلهم، الإعلام وجبهة الإنقاذ وبلاك بلوك وأمريكا ياكلوا وشى، وتتقلب عليا الدنيا، لكن لما جزء منهم يتصاب وكام واحد يموت، الباقى يخاف ونقدر نقول للإعلام إن اللى قتلهم طرف تالت أو بلطجية مدسوسين!!....

أبو القناديل: ماتزعلش نفسك ياسى مرسى أبو إسماعيل برضه دراعك اليمين...

الريس مرسى: ماتقولش دراعى اليمين.. دراعى اليمين قال!!.. أنا لولايا مصر والجبهة والليبراليين كانوا يذلوكم ويخلوا أكبر مافيكم يمسح جزمة أعفن واحد فيهم.. دراعى اليمين قال.. بينا على الاتحادية علشان أقول بيان، أنعى فيه الشهدا ونتصل بالبرادعى...

أبو القناديل: ماتخلى الحكاية دى يومين كمان ونطلع النهارده نتسامر مع بديع فى المقطم الشهدا دمهم لسه مابردش!!...
الريس مرسى: نبرده عايزهم يقولوا علينا إيه فى البلد؟.. الإخوان مابيعرفوش الواجب!!..

على الموبايل "مرسى" يطلب "البرادعى" ويكلمه:
البرادعى: أهلا يامرسى..
الريس مرسى: مرسى كده حاف؟ من غير ريس؟!!..
البرادعى: ريس مين ياأبو الأمراس انت لسه فاكر ماخلاص أنت فقدت شرعيتك مع دم كل شهيد سال على الاسفلت فى التحرير والاتحادية وكل مصرى اتسحل واعتقل مع محاصرة الدستورية ومدينة الإنتاج الإعلامى وإعلاناتك الدستورية وعزل النائب العام وده مش من حقك أقول إيه ولا إيه.. خلى اللى فى القلب فى القلب، وماتستناش منى أقولك ياريس!!!..
الريس مرسى: بأه كل ده جواك يابرادعى.. ده أنت معبى منى على الآخر بالنسبة للشهدا دول أهلهم فى رقبتى وبعدين حد قال لهم يرموا نفسهم فى النار ويقفوا قدام القطر.. همه اللى جابوه لنفسيهم.. أنت عاوز وزير داخليتى يقف يتفرج عليا وأنا بتهدد من شوية عيال ماسكين حجارة وكام إزازة مولوتوف كان لازم يعمل كده.. ده لحم كتافه من خيرى!!..

البرادعى: قصدك خير مصر..
الريس مرسى: ماتفرقش ما أنا مصر!!..
البرادعى: مش دايمالك لو دامت لغيرك كانت دامت لك.. الأيام دول يامرسى..
الريس مرسى: بطل حقد ونفسنة.. أنا جاى بالصندوق يعنى بالديمقراطية بتاعتكم!!..

البرادعى: أنت جيت بجهل الناس وقال الله وقال الرسول وخوف الناس من الحرامية قالوا أبو دقن مش حيسرقنا وحيراعى فينا ربنا، وفعلا أنت راعيت فيهم ربنا وقتلت ولادهم علشان الكرسى والحكم ده اللى أنت عملته فيهم يامرسى بس بالصندوق برضه حتمشى.. الناس فهمت وشافت وجربت واتنورت ومش حيخش عليها تانى نظام أهلى وعشيرتى وكلام الدين.. الناس عرفت أن كلها زى بعضها أبو دقن زى اللى من غير دقن.. على الأقل اللى من غير دقن أشرف لأنه مابيسرقهمش باسم الدين، وكلام ربنا وكلام الرسول.. بيسرقهم عينى عينك عيانا بيانا!!..

الريس مرسى: أنت ظالمنى يابرادعى.. اللى حاصر مدينة الإنتاج الإعلامى مش أنا ده أبو أسماعيل!!
البرادعى: وأنت إيه وأبو إسماعيل إيه.. مش ده راجل من رجالتك؟!!
الريس مرسى: ده عمل كده من دماغه..
البرادعى: اللى مايعرفش يحكم على رجالته.. مايعرفش يحكم بلد يخربها ويقعد على تلها..
الريس مرسى: طيب تعالى نتفاهم ونقعد مع بعض ومحلولة بإذن الله..
البرادعى: مش حنوليهالك أنت عايزنى أقعد معاك علشان تلقطلى صورة تبعتها أمريكا علشان صندوق النقد الدولى يوافق إنه يديك القرض همه رهنوا الموافقة على القرض بتوافق كل الشعب وصلحكم مع الليبراليين ومعايا أنا وحمدين وأنت عاوزنى أحضر علشان تثبت لهم أننا اتصالحنا مع بعض، ده بعدك وبعينك يامرسى...
الريس مرسى: ححلها من غير صورتك ومن غير أمريكا.. ححلها بقطر وبعض الدول التانية وأنا راكب راكب!!!

البرادعى: أنت بتحلم بكره تقول البرادعى قال وتقول يارتنى سمعت كلامه بس بعد فوات الأوان..
الريس مرسى: مع السلامة يابرادعى علشان ألحق ألقى خطابا أنعى فيه شهداء الاتحادية.. قلبى مع أهاليهم والله !!
البرادعى: مش عارف أرد أقول ايه أدى الله.. وأدى أمره ..
الريس مرسى: البركة فيكم أنتم بقى تعقلوا الباقيين دول لحمكم ودمكم برضه والشهدا ألف رحمة تنزل عليم بس لينا حداكم طلب تبطلوا تتظاهروا شوية...

البرادعى: ياناس هو دم الشهدا ما رواش عطشكم ؟
الريس مرسى: أنا عايل همك وهم حمدين فى الموضوع ده..
البرادعى: تقتلوا القتيل وتمشوا فى جنازته!!!
الريس مرسى: وجنازتك وجنازة حمدين وحياة غلاوتك العقل فى الحاجات دى أسلم
البرادعى: بلد جاهل بلد غبى...
الريس مرسى: بلد عاقل بلد حكيم شىء من الجهل مايئذيش.. ياسر على بكره حيتكلم معاك أنهى أمرك معاه.. البركة فيك ياراجل

ويغلق الريس مرسى الخط...
خيرت الشاطر: إيه يامرسى زعلان ومتأثر ليه من اللى أنت بتعمله؟ أنا عايزك زيى انت اللى ورثتنى أنت دراعى اليمين أنت اللى أخدت مكانى لو ماكنتش صقر حياكلوا لحمك حينهشوك حيحاوطوك زى الديابة أنا عايزك وحش عايزك تاكل مصر...
الريس مرسى: حاضر ياخيرت...
أهه بالبدلة دى، بالدقن دى،بالبصة دى، باللهجة دى، أهلى وعشيرتى بالحجة دى الفلول والبلطجية، باللؤم ده مالى مصر فقر وجوع، وياعينى ياعينى ياعينى على البلد.