فيلم الموسم (وامصراه)

فيلم الموسم ( وا مصراه ) بطولة محمد مرسى فى دور: عز الدين أيبك، محمد البرادعى فى دور: سلامة، خيرت الشاطر فى دور: بلطاى، أحمد شفيق فى دور: فخر الدين أقطاي، حمدين صباحى فى دور: محمود، عمرو حمزاوى فى دور: بيبرس، الثورة: (جهاد)، مصر: (شجرة الدر) حازم أبو إسماعيل فى دور: كتبغة، أنصار أبو إسماعيل (التتار)، مظهر شاهين فى دور: الشيخ ابن عبد السلام .
مشهد رقم 1 مرسى: مولاتى أنا حضرت أقدم إخلاصى وخضوعى.
مصر: أيوة يامرسى أنا متأكدة من إخلاصك وعارفة ثقتك فى نفسك بس أنت عايز بجوازك منى تحصل على سلطة أكبر وأكتر وعايز تحصل عليها بسرعة.
مرسي: مصر لازم يكون لها رئيس.
مصر: مرسى بيصدر أوامره لمصر؟
مرسي: الناس منتظرة رئيس يعرف يتعامل مع الدول التانية ويعمل على إحلال الأمن فى البلاد وإذا لزم الأمر يقودهم للحرب.
مصر: أنا ماسمعتش الناس فى الشوارع بتهتف إن مصر لازم تكون من نصيب مرسى ومرسى بالذات.
مرسي: مش حتسمعى الناس أبدا بتهتف باسم شفيق لأن الناس بتكره شفيق، شفيق فلول.
مصر: الناس بتكره شفيق وبيحبوا مرسى؟ .. الناس عاوزة مرسى كرها فى شفيق لأنه من الفلول مش حبا فى مرسى، أنت لازم تفهم ده كويس وبلاش الغرور يملاك وتفتكر إنك لو نجحت وفوزت بعرش مصر تبقى تستحقه، لأ ده حيكون غصب عن الناس لأن المقارنة انحصرت بينكم أنتم الاتنين بس.
مرسى لا يرد
مصر: شوفت إزاى من الصعب عليك إنك تجاوب، وأنا صعب عليا إنى اختار بين اتنين بيكرهوا بعض، وبيحاربوا بعض، أنت طموح يامرسى؛ لكن فيك عيب خطير أنت شريف فى أعماقك؛ لكن تنقصك الجرأة والخبرة والحنكة السياسية وولاؤك الأكبر حيكون لجماعتك ومش دى صفات اللى بيطمح فى الجلوس على عرش مصر؛ أنا قبل ما اقرر أى شىء لازم اسمع شفيق.
مرسي: مصر تسمح بلحظات أشرح فيها موقفى بكل وضوح ؟
مصر: اتفضل ..................قطع
-مشهد رقم 2
شفيق: أنا سعيد جدا انك فتحتيلى صدرك وبتتكلمى معايا ده معناه انك رفضتى مرسى.
مصر: أنا بقارن بينكم وده مش معناه انى رفضت مرسى.
شفيق: حتندمى لو مارفضتيهوش.
مصر: شفيق بيهدد مصر؟
شفيق: أنا بتكلم بمنتهى العقل وافتكر انه جه اليوم اللى الواحد لازم يكلمك فيه بمنتهى العقل.
مصر: إذن لازم أسمع .. اتفضل القى خطبتك ياجناب الطيار شفيق.
شفيق: شعب مصر بيطالب..
مصر: أنا مش مصدقة ودانى شفيق بيتكلم نيابة عن شعب مصر؟! معظم الشعب بيكرهك بلادهم اتسرقت وأملاكهم ضاعت بالسرقة اللى أنت ونظامك سرقتوها من البلد حتى لما مسكت الوزارة خنت الثوار ووزعت عليهم بمبونى علشان افتكرتهم شوية عيال حبيت تضحك عليهم وفقسوك واتريقوا عليك وعلى البلوفر فى الفيس وتويتر.
شفيق: لابد من يد قوية تمتد لوقف التمرد والخارجين عن القانون أنا حرجع الأمن فى 24 ساعة، لو حكمت مصر الشعب حيكون سعيد لما يحكمه رئيس قوى ومصر لازم يرأسها رئيس قوى.
مصر: والرئيس القوى أنت ياشفيق؟ أنا متصورة الشعب المصرى وهو بيهتف لكن ياترى حيهتفوا للاسم ده بسعادة؟ ياترى حيشكروا الصندوق ولا حيلعنوه أنه جاب شفيق رئيس ليهم؟ وياترى شفيق خليفة مبارك فى مصر حيكون رئيس حقيقى ويحقق العدالة الاجتماعية وما يفرقش بين الناس ويعدل بينهم ويحقق لهم الأمن والأمان ويرجع حقوق الشهداء ومايضطهدش حد؟ ولا حيدورها زى حسنى ماكان مدورها بأمن الدولة؟
شفيق: ده فعلا اللى حيحصل أنا ححترم دايما كل رغبات مصر والمصريين وحطيع كل أوامر مصر ومفيش أمن دولة تانى.
مصر: أى أوامر؟ أى أوامر؟
شفيق: نعم أى أوامر .. سوف أطيع أى أوامر.
مصر: إذًا اركع، اركع، اركع.
" ويرفض شفيق الركوع "
مصر: ده جوابك ياشفيق أنت راجل متكبر زيادة عن اللزوم كبريائك جعل منك راجل أبله عبيط لو كنت انحنيت كنت أصبحت رئيسا لمصر لكن دلوقتى ...... قطع.
مشهد رقم 3 ..... مرسى رئيسا لمصر
حمدين: أنت حقيقى يامرسى بقيت رئيس لمصر ولا حليف للإخوان؟ تنفذ كل أوامرهم ورغباتهم؟
مرسي: أنا ما اسمحلكش تكلمنى بالطريقة دى أنا دلوقتى بقيت رئيس الجمهورية.
حمدين: أنا بنصحك وقلبى عليك وعلى مصر أنت كده بتعادى المصريين والثوار لحساب فصيل واحد.
مرسي: سيبك من الكلام ده وبطل تسمع كلام الراجل اللى اسمه البرادعى .. البرادعى ده لازم يسكت دلوقتى، أنا لازم استعد لمتاعب الفلول والمعارضة بعد مابقيت الرئيس وأحاربهم وأنتصر عليهم.
حمدين: احنا كده حنحارب بعض ومش بعيد توصل لحرب أهلية اعقل يامرسى وكون حكيم وجنب الشعب الهلاك واعمل الصح .
مرسي: إيه هو الصح من وجهة نظرك؟
حمدين: اعمل تعديلات على الدستور يرضى عنها كل الشعب شكل وزارة جديدة بعيدة عن الإخوان اعمل حوار مع كل أطياف الشعب والمعارضة وخصومك إلغى الإخوان ومكتب الإرشاد من حياتك وخليك رئيس لكل المصريين شيل النائب العام وغير وزير الداخلية والإعلام ورجع الأمن للشارع ووقف الإخوان عند حدهم وكفاية إهانات وتطاول على كل المؤسسات وابعد إيدهم عن القضاء.
مرسي: أنا شلت طنطاوى وعنان وشكلت وزارة لها كامل الولاء ليا وللإخوان وحأخون البلد كلها.
حمدين: ده مش صح أنت ماتقدرش تغير نظام البلد كلها فى يوم وليلة.
مرسي: أقدر.
حمدين: صحيح تقدر لكن ده حيسبب فوضى وافتكر إن مصر فيها فوضى بما فيه الكفاية مصر بتنهار وأنت واقف تتفرج والشعب بيئن من غلاء الأسعار والضرائب وانقطاع التيار الكهربائى وانقطاع المياه وأزمة السولار وعدم تحسن حال رغيف العيش وزيادة معدلات البطالة وعدم الأمان فى الشارع.. الاحتجاجات بقت مالية مصر وكذلك المظاهرات، وفيه احتقان طائفى وبلطجة وسرقه وحرائق واغتصاب وتحرش، أنت كده مودينا للهلاك.
مرسي: ده من وجهة نظرك أنت لكن من وجهة نظرى أنا أنا بعمل الصح.
حمدين: أنت مش بتعمل الصح أنت بتلعب الدح واللى يلعب الدح مايقلش بعد كده اح، وأنت كده حتقول اح يامرسى حتقول اح.
مرسي: أنا عارف اكتر منك أنا عاوز إيه ومصر عاوزة إيه.
حمدين: بلاش غرور يامرسى أنت كده بتجرنا للهلاك مرسى مبقاش يحب يسمع الحقيقة هو أنت كده مرسى الشريف اللى فتح صدره للثوار فى ميدان التحرير بعد مابقى رئيس جمهورية، ووعد المصريين بوعود كلها طلعت فشنك، هو أنت كده رجل المبادئ مين اللى واقف قصادى ده مرسى ولا مبارك!
مرسي: مبارك انتهى وبقى فى عداد الأموات.
حمدين: الحقيقة اللى أنا شايفها قدامى دلوقتى إن مفيش فرق بينكم، مرسى هو مبارك ومبارك هو مرسى وأنت مش بتتعظ من اللى حصل لمبارك وبكرة تشرب من نفس الكاس اللى هو شرب منها.
مرسي: هى حصلت تقول كده طيب أنت طالما مش ناوى توافقنى الرأى أنا حبيع مصر.
حمدين: ما أنت بعتها خلاص للقطريين والسودانيين والإيرانيين والأتراك ويا عالم بكرة حتبيع اللى فاضل فيها لمين يمكن لإسرائيل!
مرسي: أنا اللى جبت لمصر 20 مليار دولار فى تسعة شهور فترة حكمى ورحمتكم من الفقر.
حمدين: اهه أنت اعترفت بنفسك أنت داينت مصر فى 9 شهور ب20 مليار دولار ومبارك داينها ب30 مليار دولار بس فى 30 سنة مش فى 9 شهور يعنى مبارك أفضل منك،
مبارك كان قاعد على غطا بلاعة أول ما قومناه من عليه البلاعة انفتحت واللى فيها من وساخات وقاذورات جه علينا وطرطش علينا وملى هدومنا وغرقنا وأنت أضعف من إنك تسدها يا مرسى أنت لازم تسمع الناس بتقول عنك وعن حكومتك إيه الناس كرهوك وكرهوا الإخوان ومبقاش عندهم أى ثقة فيكم يامرسى أنت فى كل الأحداث اللى بتمر بيها مصر من مظاهرات واحتجاجات ووقوع شهدا وفتنة طائفية بتسكت وما بتتكلمش ولا بتتدخل خالص وبتسيب البلد وتسافر تشحت علينا وبتعمل ودن من طين والتانية من عجين أكنك بتبارك كل اللى بيحصل فى البلد من خراب.
عدم اللامبالاة ترف مايملكوش كل واحد ومش ممكن يغتفر إلا إذا استخدم بحرص وأنت دايما تستخدمه لدرجة أنه أصبح رذيلة وحيحطمك
مرسي: يعنى أنت رافض تقف جنبى؟
حمدين: اقف جنبك فى الحق مش فى الباطل وأنت كل اللى بتعمله فى البلد ده باطل
مرسي: يعنى أنت بترفض؟
حمدين: أيوه برفض.
مرسي: يبقى أنا حرمى الثوار وشباب 6 إبريل فى المعتقلات وحصدر الأحكام العرفية.
حمدين: أنت كده بتقتل نفسك يامرسى.
.........................قطع
مشهد رقم 4 "بعد هلاك مرسي"
البرادعي: أبو إسماعيل وأنصاره راجعين يطالبوا بحكم مصر وخيرت لسه بيحلم انه يبقى رئيس لسه بيحلم بالكرسى وعرش مصر .
مظهر شاهين: يعنى مفيش فايدة مرسى راح وجاى أبو إسماعيل يطالب بحكم مصر إحنا حنلاقيها منين ولا منين ده ابتلاء بس إحنا لازم نستحمل ومصر لازم تكون مدنية وحيجى اليوم اللى يظهر فيه راجل يوحد المصريين ليبراليين وسلفيه وإخوان وأقباط تحت راية الحق والعدل والمساواة أنت الراجل ده ياحمدين.
حمدين: أنا بس أنصار أبو إسماعيل عددهم كتير والجبهة متفرقة ولازم تتوحد وفى الآخر الصندوق هو اللى بيحدد مين اللى يحكم مصر .
مظهر شاهين: المرة دى مش حنديهم الفرصة كلنا معاك ياحمدين مسلمين وأقباط ماتخافش طول ما الحق معاك واملنا بكرة فيك حيتحقق بعون الله ................. قطع
مشهد رقم 5
أبو إسماعيل: مين حيتكلم نيابة عن مصر؟ فين شفيق؟
حمدين: شفيق هرب بره مصر.
أبو إسماعيل: وفين مرسي؟
حمدين: مرسى تعيش أنت ياحاج، هو ده السبب اللى جابك تتحاور معانا إن كل دول مابقاش ليهم وجود.
أبو إسماعيل: وأكلم مين لما احب اخاطب الشعب المصرى؟
حمدين: تقدر تتكلم معايا أنا.
أبو إسماعيل: لكن أنت مين؟
حمدين: مواطن من شعب مصر .
أبو إسماعيل: من الشيخ حازم صلاح أبو إسماعيل سيد الناس ومحطم الهمم عليكم السمع والطاعة والتنازل عن عرش مصر وأن تكون مصر دولة دينية تحكمها الشريعة الإسلامية تنتقب فيها النساء منعا للبلاء ودرء الفحشاء، وتمنع فيها السجائر والشيشة وبيع الخمور، وتغلق فيها المقاهى والمواخير ويعمل فيها بحد الحرابة وعدم عمل المرأة وعدم تواجدها فى الشارع بعد التاسعة مساء وعلى الرجال لبس الجلباب الشرعى وإطلاق اللحى وقص الشوارب وعدم التسكع فى الطرقات أو مغازلة الفتيات ومنع الرقص والغناء فى الفضائيات.
احنا بنحذر مرة واحدة بس حتسلموا حتنولوا رضانا حترفضوا حتواجهوا الموت ومحاصرة أنصار أبو إسماعيل زى ماحاصرنا مدينه الإنتاج الإعلامى والمحكمة الدستورية بلاش تتحدوا أنصار أبو إسماعيل.
إيه ردكم؟
"حمدين يرفض الانصياع لرغبات أبو إسماعيل"
أبو إسماعيل: أنت عارف ده معناه إيه؟ لكن أنت مين؟ أنت مابتمثلش مصر !
حمدين: أنا اديتكم ردى وما اعرفش مين معايا ومين ضدى؟
الثوار: كلنا معاك، كلنا معاك فليحيا الرئيس حمدين، فليحيا الرئيس حمدين.
حمدين: أبو إسماعيل إذا تجرأ أى واحد من أنصارك على العبث بأمن مصر حيدفع التمن حياته.
أبو إسماعيل: إذن لقاءنا فى الصندوق.
حمدين: ليكن إذن ما تريد ليصبح الصندوق هو الحكم والفيصل بيننا.
الثوار: إلى الصندوق، إلى الصندوق، إلى الصندوق.
"ويأتى يوم الانتخابات وينتصر الثوار"
الثوار: انتصرنا يا برادعي، انتصرنا ياحمزاوي، انتصرنا ياحمدين.
حمدين: جه اليوم اللى حلمنا فيه اتحقق ................................... البداية.