افرض جدلا!!

انك نايم والساعة داخلة على خمسة الصبح موبايلك يرن..
تصحى من نومك مفزوع تلاقى صوت هادى ناعم يطّلّع كلمة كل دقيقة..
يقولك بصوت واطى يادوب تسمعه مبروك تم اختيارك وزيرا فى التشكيل الجديد..
وطبعا لأنك مش مصدق الموضوع تسب وتلعن ويطلع منك قاموس قلة الأدب المركون على الرف..
والست تسألك فيه حاجة خير مين ده .. ترد عليها وانت قرفان واحد مش متربى مش جايله نوم حب ينكد عليا ..
معلهش نامى انتى .
ويرن الموبايل تانى وتلاقى نفس الصوت ويقسم لك بكل الايمان ان الريس اختارك وزيرًا ويطلب منك انك تسمعه إلى حد الآخر فتستعين بالصبر من سيدنا أيوب .
وبصوت واطى جدا يقولك.
انت ليك عشرين سنة فى الأرشيف صح؟
تفتح عيونك وتقول صح.
ومسمينك الغبى والفاشل والمنافق صح؟
عيونك تفنجل اكتر وتقوله صح.
ومادى وبيقولوا عليك إن جدك يهودى عشان بتحب الفلوس صح؟
تلاقى نفسك من غير ماتحس تقوم من على السرير وتقوله صح.
تلاقيه يضحك ويقولك وعشان كده هما اختاروك.
وتسأله هو حضرتك صوتك واطى ليه هو الكلام ده حرام ولاعيب ولا انت خايف من حد!
تلاقيه يوطى صوته أكتر .
ويقولك اصل الست نايمة وانت عارف ان العصبى بتزيد عصبيته لما يصحى من النوم .
وزى ما بيقولوا نوم الظالم عبادة .
والواحد مش ناقص هم ونكد .
خلينا فى موضوعنا معادك بكرة بعد صلاة الضهر تكون موجود فى القصر.
مبروك يا معالى الوزير.
وإن شاء الله يارب دايما وزير فاشل فى حكومة فاشلة برياسة قنديل .
ترد وقلبك يرقص من الفرحة وتقوله الله يبارك فيك .
وفجأة تلاقى صوته زى الرعد ويقول لك ها ها أنت صدقت يافاشل .
_ قولى بقى: لو انت مكانى تعمل إيه؟!