الملزمة فيها عفريت

يا اخى ليه كل ما تييجى تذاكر .. الظروف كلها بتبقى ضدك .. جرب مره تقوم كده و تفتح الكتاب .. هتلاقى الف مانع ومانع .. مفيش قلم .. تدور على قلم .. مفيش ورق .. تدور على ورق .. وتفضل كده بتاع نص ساعه تدور حوالين نفسك .. فى الاخر ربنا يفتحها فى وشك و القعده تظبط و خلاص هتذاكر .. تليفونك يرن فى الاوضه التانيه .. تروح ..
(ها يا فلان .. دلوقتى لا ياعم انا بذاكر .. لا بليل الناس بتنام اصحى انا اذاكر ليه ؟؟ خلاص هشوف .. سلام) .
تخلص المكالمه .. تفضل تلعب فى التليفون و خلاص .. تحطو فى جيبك و تقول قوم ذاكر يا سى زفت .. وانت رايح تلاقى التليفزيون شغال لوحدو .. و تلاقى الحته بتاعت الفيلم اياه الى انت بتحبها .. تشوفها على الواقف .. رجيلك توجعك كأنك واقف من عشر سنين .. تقعد .. تيجى اعلانات .. تقلب .. تلاقى فيلم بتحبو اكتر من الفيلم اياه .. تتفرج شويه .. تيجى اعلانات .. ترجع للفيلم اياه .. تلاقى الاعلانات لسه شغاله .. تقلب .. تلاقى اعاده البرنامج بتاع امبارح الى علان قالك انها كانت جامده .. تتفرج .. تزهق .. تشتم علان و تغير .. تجيب قناه الاهلى .. تلاقى اعاده متش الاهلى .. تتعصب و تتنرفز مع كل كوره وحشه من جدو و كل فاول عملو احمد فتحى و كل باصه مقطوعه من جمعه .. و تقول لو كان نزل زفت سعيود كان قلب المتش .. تغير عشان دمك ميتحرقش .. تجيب الفيلم اياه .. تلاقيه خلص .. تفتكر ان المفروض انك تذاكر .. تخش الاوضه كانك داخل تتعذب .. تلاقى الكمبيوتر فى وشك .. تقول انا هبص بس على الفيس يمكن يكون حد نكشنى نتوفيكشن ولا حاجه .. و دى مش هتاخد عشر دقايق .. تلاقى كده كام كومنت .. ترد .. حد منهم يكون قاعد .. فترد .. فيرد .. فترد .. فيرد .. ربع ساعه على الحال ده .. فتزهق من امو .. تبص على الفارم بعدها يالاكوره و مصراوى و ماايجى الخ الخ الخ .. تبص فى الساعه .. دى بقت تمانيه .. تطفى الجهاز .. تقعد تذاكر .. تفتح الملزمه .. ترسملك بطه ولا قطه .. تسمع الصفاره .. ده فلان :
(انزل ياض)
(لا ياعم انا بذاكر )
( من ساعتها يابن الدحيحه )
(و المصحف ما ذاكرت حرف )
( بطل كدب يا بن الكدابه و انزل ) .. فتنزل.
تروحو المكان اياه .. تلاقو الشله اياها .. تلعبو اللعبه اياها .. دور فى التانى .. هوبا .. الساعه بقت 1 .. تفتكر انك ماذكرتش حرف .. فتروح .. البيت هس هس .. تقعد على الملزمه .. تفتكرها .. تكلمها .. دو دو دو دو دو دو .. الفجر يدن .. تصلى لو كنت بتصلى .. و تخش تنام.