أهالي دائرتى الكرام.. أنا جمعتكم النهاردة علشان أقولكم إننا لازم نلتمس الأعذار لنوابنا.. رغم إنهم لم يحققوا لنا أي مصلحة حتى الآن طبعا حد هيسألنى يعنى إيه نلتمس لهم الأعذار ياعم البااارلمنجى.. هو أنت عايز تجننا ياراجل انت؟! وأنا بقى هرد عليه وأقول له إن هذا ليس كلامى.. إنما هو كلام أحد نواب دايرتنا عندما كان سهرانا معنا في ثالث أيام العيد.. أي والله سيادة النائب كان سهرانا معانا بذات نفسه.. حاكم سيادته لما بينزل البلد بيلاقى المندوب بتاعه قد أعد له قائمة بالموتى ليقوم سيادته بتعزيتهم. نائبنا بقى لاحظ أن عدد الحضور كبير، فقرر أن يمد في سهرته معنا علشان يتونس بينا ونتونس بيه.. قوم إيه الشباب بتوع العائلة هاتك يا أسئلة لسيادته.. عملت إيه للناس.. الناس تعبانة.. الجزيرتين مصرية واللا سعودية.. الصرف الصحى مجاش عندنا.. العيال بتوع البرشام والبانجو ماليين النواصى والحكومة مش سائلة فينا رغم البلاغات.. العيشة بقت صعبة ياسيادة النائب.. لأ وإيه ده كمان فيه زيادات جديدة على أسعار الكهرباء والبنزين والسلع التموينية.. وطبعا المواصلات سترتفع أجرتها وممكن السكر يختفى تانى والرز كمان وهنا بقى قام سيادته برفع يده وقال لهم أنا عارف كل المشكلات دى وعايشها زيكم.. بس قولولى انتم: إحنا كنواب ممكن نعمل إيه؟! الحكومة مش بتعبرنا ياجدعان.. وبتحرجنا مع أهالي دوايرنا.. يعنى أنا دلوقتى قاعد في نص هدومى،لأنى ماعنديش إجابة على أسئلتكم.. بصراحة أنا مكسوف منكم.. لكن الأيام الجاية إن شاء الله هتشوفوا فيها خير كتير يعوضكم عن كل ما فات. ده كان كلام نائب دايرتنا.. قال إيه مكسوف مننا وقاعد في نص هدومه.. طب إحنا منتخبينه يعنى علشان نخدش حياه ولا إيه؟! أنا بقى من هنا أحب أقولكم إننا لازم نراعى ظروف نواب دايرتنا ومانحاولش نحرجهم تانى.. سواء أمامنا أو أمام وزراء الحكومة مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.